Shillong, K’Lyngkot 16
Ka Sorkar Jylla ka la ai ka jingmynjur ban pynrung ïa ka Community Integrated Skill Learning kum ka bynta ban pule (Curriculum) ba la pynbeit ryntih na ka bynta ki klas VI haduh X.
Haba pynbna ïa kane ha ka sngi Thohdieng, u Myntri Rangbah u Conrad K Sangma u la ong “Ka kynhun Myntri ka la ai ka jingmynjur ïa ka jingtyrwa ban pynrung ïa ka Community Integrated Skill Learning kum ka bynta ban pule ba la pynbeit ryntih na ka bynta ki klas VI haduh klas X.
Kane ka sienjam ka thmu ban pynrung lang ïa ka sap ka phong ki khynnah ha ka Physical and Health Education Curriculum, ha kaba 50% ka marks yn sa ai sha ki khynnah skul kiba shim ïa kano-kano ka sap na ki bahaïing hasem ne ki shnong ki thaw.
“Ngi thmu ban buh 50% ka marks ïa ki khynnah ban suk ban shimbynta ha kata ka sobjek, ha kaba yn bthah ïa ki khynnah skul ban hikai lang ha kawei ka sap ne bun ki sap kaba ki kwah ban leh” ong u Conrad.
Kane ka sap ka lah ban don jingïadei bad ka kam khaïi pateng ne ka trei ka ktah ki bahaïing hasem, kum ka jingshet jingbam, ka rep jingrep lane ka kam shoh nar, ka ban ailad ïa ki khynnah skul ba kin shim ïa ki jinghikai na ki kmie ki kpa ne ki bahaïing hasem.
Kane ka sienjam kan don bun ki jingmyntoi, kynthup ka jingpynlah ïa ki khynnah skul ban don ïa ka sap ka ban don jingmih, pynshlur ban bteng ïa ki kam ba trei ba ktah ki bahaïing hasem bad kiwei-kiwei.
U Myntri Rangbah u la ban jur ba kane ka sienjam kan pynshlur ïa ki khynnah skul ba kin ïakren ïakhana bad ki kmie ki kpa bad ban shim ïa ki jinghikai ha ki sap kiba kynsai, haba ïoh marks ruh ha ki jingpule jong ki.
