Shillong, K’Lyngkot 16
Kum shi bynta ban kyrshan ïa ka Nabon Mem-orial Home kaba don ha Mawiong Rim, ka Jingïa -seng Kynthei Shillong Rilum Presbytery ka la pynlong ïa ka ‘Food Fest’ ha All Saints Hall, Shillong khnang ban lah pyndep noh ïa ka jingtei ïa katei ka jaka ri tymmen.
Ha kane ka jingïalang la wan ban long kongsan da u MP ka Shillong u Dr. Ricky AJ Syngkon, u Symbud Kongsan u Rangbah Shnong Lachumiere u Dr. Aman War, ka Chairperson ka Nabon Memorial Home Committee ka Kong Basbun C War ha ryngkat ka jingïashim bynta ki nongshong die bam bad kiwei-kiwei.
Haba ïoh ban ïakren bad ka Kong Basbun C War ka la ïathuh ba ka Jingïaseng Kynthei jong ka Shillong Rilum Presbytery ka buh ïa ka Nabon Memorial Home kum ka projek jong ka bad ka don ka jingthmu ban sumar bad ban ri ïa ki riew tymmen kiba ym don shuh ki nongpeit nongsumar khamtam na ka bynta ki kynthei.
Shuh-shuh ka la ïathuh ba ka Nabon Memorial Home ka dei ka projek kaba la sdang arphew snem mynshuwa kaba don ha Pynthorumkhrah Shillong, hynrei namar ba katei ka jaka ka ju shah ktah na ka jingshlei um ha ka por lyiur, kumta ka Jingïaseng Kynthei ka la shim da kawei ka sienjam ban kynriah noh sha Mawiong Rim kaba yn sa ïoh ban plie ha kine ki sngi ban wan.
Ka Kong Basbun ka ïathuh, ha kaba sdang ka jingpyrshang kin shim kumba hynñiew ngut eiei ki riew tymmen bad kin pynbiang nadong shadong ïa ki jingdonkam jong ki ha katei ka jaka ri tymmen.
“Kaba pynlong ïa ka Jingïaseng Kynthei ban phai khmat ban ri bad sumar ïa ki riew tymmen, ka long ba haduh mynta ïa ki riew tymmen ym don ki nongri nongsumar, ym pat don ki ban shimti ban peit ban ïarap, hynrei ngi sngewthuh shai ba ki donkam bha ïa ka jingïarap bad ki don bun bha kiba donkam ïa ka jingïarap” la ïathuh ka Kong Basbun.
