Shillong, K’Lyngkot 16
U Dr. Ricky AJ Syngkon, MP na Shillong Parlia-mentary Konstitwensi u la ong ba kum ka Party kam tip kaei ka jingthmu jong ka Sorkar Jylla ban wanrah sa ïa kata ka Immigration and Foreigners Act, 2025, kaba ki ong ban long ka jingïada na ka jingwan rung kyrthep ki briew ba nabar, hynrei kum ka Party hi ka dawa beit ïa ka Inner Line Permit (ILP).
Haba kren sha ki lad pathai khubor ha ka sngi Thohdieng jong ka taïew u Dr. Ricky Syngkon u la ong “Nga la phah ka jingthoh sha u Myntri Kam Pohïing ka Sorkar India u Amit Shah ban dawa pyntreikam noh ïa ka ILP ha ka Jylla jong ngi, kumba leh ha kiwei ki Jylla”.
Kumta u la ban jur da kaba ong “Ngi ïengskhem ha ka nongrim ban dawa ïa ka ILP bad kaei kaba kiwei ki ong kum ka party ngim tip, hynrei ka ILP ngi donkam ha ka Jylla”.
Haba kylli u Dr. Ricky u la ong ba kumba ka Sorkar Jylla ka la mynjur ïa kane ka Resolution ha ki snem ba la dep ban dawa pyntreikam ïa ka ILP, kumta dei ban pynneh beit ïa kane ka mat jingdawa.
Shuh shuh u la kyntu ïa ka Sorkar ba kumba ka Ïingdorbar Thawaiñ ka Jylla ka la buh hakhmat eh sha ka Sorkar India halor ka ILP, kumta dei ban pan tang ïa kata.
Lah ban kdew hangne, ba dangshen ka Sorkar Jylla lyngba u Bah Prestone Tynsong, Symbud Myntri Rangbah ba khmih ïa ka tnad Kam Pohïing u la ong ba ka la don jingïakren bad u Amit Shah, ba yn bsuh ïa ki kyndon ba syriem kum ka ILP ha ka Immigration and Foreigners Act, 2025, ban ïada ïa ka jingwan rung kyrthep ki briew ba nabar sha ka Jylla.
