Mawkyrwat, K,lyngkot 16:
Ka Civil Hospital Maw-kyrwat ha ka 16 tarik u Kyllalyngkot 2026 ka la ïoh ban rakhe lehkmen ïa ka Foundation day (Sngi sdang) ha kaba u Bah Renikton L.Tongkhar u la long kum u kongsan. Ha kane ka sngi la ïoh ruh ban plie ïa ka kamra thymmai na ka bynta ka Operation Theatre (OT) ha ryngkat ka jingdonlang u Medical Superin-tendent barim ka Civil Hospital Mawkyrwat, ka Dr. M. Lyngdoh ka Medical Superintendent ba mynta bad baroh ki nongtrei jong ka Civil Hospital Mawkyrwat.
Haba kren ha ka jingïalang, u Bah Renikton, uba dei u MLA ka Mawkyrwat Consti-tuency u la ai ka jingïaroh ïa baroh kiba la ïa don bynta lang ban pynurlong ïa ka jaka sumar ba 100 jingthiah jong ka Civil Hospital Mawkyrwat kaba la kham bit kham biang ban ïa nujor bad kiwei de ki jaka sumar hapoh ka Jylla.
U la pynkynmaw ruh ba ka jingurlong jong kane ka 100 jingthiah ruh ka dei lyngba ka jingprat lynti jong uwei na ki riew rangbah ka dong ka thaiñ, u (L) Rowell Lyngdoh uba dei u MLA barim jong ka Mawkyrwat Constituency ha kaba dei lyngba jong u ba kane ka jaka sumar kan don hapoh ka Mawkyrwat.
Shuh shuh u la ong ruh ba watla ka dang kynjoh mynta tang 3 tylli ki snem hynrei da ka jingtrei shitom ki doktor bad baroh ki nongtrei ha kane ka jaka ai jingsumar ïa ki nongpang, khamtam ïa u Dr. W. Sutnga uba la bat kum u Medical Superintendent barim u ba la lah ban pynurlong ïa shibun bah ki jingdonkam ha kane ka jaka sumar. Ym tang kata, u la ong ruh ba da ka jingdon kane ka jaka sumar ka la kham pynsuk shibun ïa ki paidbah ban wan wad ki lad jingïarap khamtam lei lei ha kane ka jaka sumar ki la lah ruh ban puid ïa ki briew da ki juk stad thymmai kaba mynta kata kaba ki khot ka ‘Laparoscopic Surgery’ ban lah ban sei ïa ki maw khyllai, jingpang cyst, appendix bad kiwei de, khlem da donkam shuh ban leit ha kiwei ki jaka sumar kiba khamjngai kum ha Shillong.
Ha kane sngi la donlang ruh u Dr. W. Sutnga, Medical Superintendent barim jong ka Civil Hospital Mawkyrwat kum u Symbud Kongsan, ka Dr. M. Lyngdoh kaba dei kum ka Medical Superintendent ba mynta, u Dr. A. Lyngdoh ha kaba ki la ai ki kyntien ai mynsiem bad jingkyrkhu kyrdoh ïa ki Doktor bad ïa baroh ki nongtrei hapoh ka Civil Hospital Mawkyrwat.
La pynshit pynshngaiñ ïa kane ka sngi da ka jingrwai na ki nongtrei hapoh kane ka Civil Hospital Mawkyrwat. Ïa ka jingïalang la pynïaid da ka Dr. P. Wankhar bad ka jingkren khublei la ïoh na ka Kong S. Thabah, Assistant Nursing Superintendent.
