Shillong, K’Lyngkot 16
Ka Nongkseh Sports Social & Cultural Club ka la pynjem khnap ïa ka kynhun ïalehkai barim ha ka I-League, ka Neroca FC kaba na Manipur da 4-0 kol bad ka la ïoh jaka ban rung sha ka semi final ha ka 11th All India Chief Minister’s Gold Cup International Football Tournament ha ka sngi Thohdieng ha Jorethang, Sikkim.
Kane ka kynhun ïalehkai ka nongbah ka la mih madan ha kane ka jingïakhun quarter final khlem u kapten u Hardy Cliff Nongbri, uba la mynsaw ka shyntur ha ka jingïalehkai ba la lah. Hynrei hapdeng kane ka jingbym don lang u nongïalam, pynban ka Nongkseh ka la lah ban ïalehkai bha naduh kaba sdang.
Kane ka lahduh jong ka SSA Champions Cup 2025, ka la ïoh ban pynkhih jar nyngkong eh lyng -ba u Banpynkhrawnam Nong-khlaw, uba la ïoh ban thep ha ka jingshut ïa ka corner. Kumjuh ka Nongkseh ka la ïai bteng ban ïakhun tyngeh bad hashwa ban kut ka jingïalehkai jong ka kylla step ka la thep biang sa shi kol hadien ba u Fullmoon Mukhim uba la mih bujli kum u kapten, u la ïarap ban pynbuh bol na ka bynta u Kynsaibor Lhuid, u bym shym la pynnohei ïa kane ka kabu ksiar na ka bynta ban tam da 2-0 kol ha ka kylla step.
Hadien ba la bteng ïa ka jingïakhun jong ka kylla miet, ka Nongkseh ka la ïoh ban thep kol biang na ka daw ka jingbakla u rangapkol ka Neroca, uba la kum pashat ïa ka bol sha u Batskhem Thangkhiew. Te kumta une u rangïalehkai shapdeng um shym la pynlehnohei ïa kane ka kabu ksiar.
Hashwa ba katei ka kynhun hapoh ka jingïalam u Bah Richard Nongneng kum u coach, ka la thep biang ïa ka kol kaba saw lyngba u Sheen Stevenson Sohktung hadien ka jingïarap pynbuh bol da u Chanmitre Thma. Lyngba kane ka jinglah ban ïalehkai bha u Sohktung u la ïohpdiang ïa ka nam Man of the Match.
Ki rangïalehkai ‘dien ka Nongkseh ki la ïai long kiba skhem bad kumjuh u rangapkol u Daraphun Talang u la lah ban pyllait na ka jingshah thep watla ka Neroca ka la ïoh ïa ki kabu kiba biang. Ïa une rangapkol la kyrshan lang da u Arlangky Nong-siej, Banpynkhrawnam Nong-khlaw, Banshkem Mawlong bad u Mickyson Tangsong ha kine ki ar tylli ki jingïalehkai ba la lah.
Lyngba kane ka nam jop, ka Nongkseh kan ïakynduh pyrshah ïa ka Red Panda FC kaba na Sikkim ha ka semi final ka ban long ha ka sngi U Blei ha ka por 2 baje nohphai sngi.
