Kolkata, K’lyngkot:
Ka Myntri Rangbah jong ka West Bengal, ka Mamata Banerjee, ha ka sngi Thohdieng, ka la kynnoh ba ki nongbylla sngi, ki shah pynshitom beiñ, namar ba ki kren da ka ktien Bengali, ha ki jylla ba synshar da ka BJP.
Ka Banerjee, kaba la leit sha ka thaiñ Shatei jong ka Bengal ban leit sha ki prokram synshar, ka la kynnoh ïa ka BJP, ba ka “thmu ban pynmih jingkulmar ha ka jylla”, namar ba “ka seng, ka la sngewthuh ba kan nym lah ban jop ha ka ilekshon sha ka ïing dorbar thawaiñ jong u snem 2026.”
Haba ïadei bad ka jingïakhih ha Beldanga jong ka Murshidabad halor ka jingshah thombor jong ki nongbylla shabar jong ka West Bengal, ka Mamata ka la ong ba ka jingbitar jong ki jaitbynriew rit paid ka long kaba “dei hok.”
Ka jingïakhih ka mih na ka jingshah thombor kaba ju jia man ka por pyrshah ïa ki nongbylla sngi, ka la ong.
“Ki nongbylla sngi na Bengal ki shah pynshitom beiñ tang ha ki jylla ba la synshar da ka BJP. Ngi ïeng ha ka liang ki bahaïing jong ki,” ka la kynnoh.
Ki nongshong shnong ha Murshidabad ki la khang ïa ka surok National Highway 12 bad thang ïa ki tyndong kali ha ka sngi Thohdieng ban pyrshah ïa ka jingkynnoh ba ki la thombor ïa ki nongbylla sngi na ka distrik ha kiwei pat ki jylla, kaba la pynthut ïa ka jingleit jingwan jong ki kali ha ka surok bah, la ïathuh ki pulit.
Ki nongïakhih ki la kynnoh ba ki nongwan buhai shnong na katei ka distrik ki la mad ïa ki jingshah lehbeiñ ha kiwei pat ki jylla namar ba ki kren da ka ktien Bengali. Ka jingïakhih ha Beldanga ka la mih hadien ba la saphriang khubor halor ka jingïap jong uwei u trai shnong na Murshidabad uba la wan buhai shnong sha Jharkhand na ka bynta ka kam, la ong uwei u ophisar.
Ka Myntri Rangbah ka la kynthoh ruh ïa ka Election Commission namar ba ka la wanrah ban pyntreikam da ka Special Intensive Revision (SIR) kaba dang ïaid shakhmat jong ki thup nongthep vote ha Bengal, da kaba kynnoh ba “kumba 100 ngut ki briew ki la duh noh ïa la ka jong ka jingim namar ka jingkhuslai” kaba ïadei bad ka jingpynkylla ïa ka thup nongthep vote.
“Ïada ïa ka burom, ka jingbym shah liang jong ka shuki jong phi, tang kumta ki briew kin burom ïa phi,” la ong ka Banerjee ha u Chief Election Commissioner, hapdeng ka jingïakren halor ka SIR.
