Shillong, K’Lyngkot 16
U Myntri Rangbah ka Jylla, u Conrad K. Sangma u la pynbna ba ka Sorkar Jylla ka thmu ban wanrah ïa ka kaiphod halor ka ‘State Reservation Policy’ ha kane ka Dorbar Mang Tyngka ban wan jong ka Ïingdorbar Thawaiñ ka Jylla kaba la tyrwa ban long naduh ka 16 haduh ka 27 tarik u Rymphang.
Haba kren sha ki nongthoh khubor hadien ba pynïaid ïa ka jingïalang jong ka Kynhun Myntri ha ka Sngi Thohdieng, u Sangma u la ong ba ka Kynhun Myntri ka la ïakren ïa ki bynta jong ka kaiphod halor ka ‘State Reservation Policy’ bad tyrwa ba ka Dorbar Mang Tyngka jong ka Ïingdorbar Thawaiñ ka dei ban sdang naduh ka pdeng bnai jong u Rymphang.
“Da kaba pynshong nongrim ha kata ka jingtyrwa, ka Kynhun Myntri ka la rai ruh ba kan long kaba biang eh ba ngin buh ïa ka kaiphod jong ka ‘Expert Committee’ ha ka Dorbar Mang Tyngka ban wan,” u la ong ha ki nongthoh khubor.
U Myntri Rangbah u la ong ruh ba ka Sorkar ka la tyrwa ïa ki tarik ban pynlong ïa ka Dorbar Mang Tyngka naduh ka 16 haduh ka 27 tarik u Rymphang bad ka dang ap ïa ka jingmynjur jong u Lat ka Jylla.
“Ngi la tyrwa sha u Lat bad ngi dang ap ïa u (Lat) ba un khot ïa ka jingïashong Dorbar na ka bynta ka Dorbar Mang Tyngka. Shisien ba u Lat u la mynjur bad pynmih ïa ka hukum, yn sa pynlong pura, hynrei ngi la tyrwa,” u la bynrap.
Ha ka 19 tarik u Nohprah, 2025, u Myntri Rangbah ka Jylla, u Conrad K. Sangma u la pyntikna ba ïa ka kaiphod jong ka ‘Expert Committee’ halor ka ‘State Reservation Policy’ kaba khia kumba 200 kilo bad kaba don haduh 4,000-5,000 sla, yn sa pynbna paidbah shen.
Ha kawei ka liang, la bynshet kam ïa u Chief Secretary bad kiwei-kiwei ki heh ophisar ka Jylla ban pule bniah ïa kawei-pa-kawei ka laiñ bad sla jong ka kaiphod ka ‘Expert Committee’ bad ban aiti ïa ka kaiphod sha ka Sorkar.
