Shillong, K’Lyngkot 16
Ka Hynñiewtrep Youth’s Council (HYC) lyngba ka Socio Cultural Cell ha ka 16 tarik u Kylla- lyngkot 2025, ka la ïoh ban sam ïa ki khusnam sha ki nongjop ha ka jingïakop thoh bad pule poitri Khasi, ‘U Khulom Ksiar’ ha ka wat kaba 3.
Ki nongjop ha kane ka jingïakop ki don 3 ngut, kata uba wan ba nyngkong dei u Samla Banjop Leo G Khar-malki, ba ar ka Samla Lahundaka Theresa Synrem, ba lai dei u Samla Freedy Boy Majaw.
Ki nongïashim bynta ha kane ka jingïakop ki don haduh kumba 66 ngut, ba kynthup naduh ki heprit haduh kiba la rangbah ruh kumjuh. Ïa kane ka jingïakop ka HYC ka la pynlong ha u bnai Nohprah 2025.
Ka jingpynlong ka HYC ïa kane ka jingïakop thoh bad pule poitri Khasi ka long kum shibynta ban kynmaw burom ïa ka lyngkhuh sngi ïap ba 84 jong u Myllung Soso Tham, uba dei u nongtbeh jingshai ha ka ri.
Haba kren ha kane ka sngi u Bah Roykupar Synrem, President u la ong ba ka jingthmu jong ka seng ban pynlong ïa kum kane ka prokram ïakop thoh bad pule ha ka ktien Khasi kadei kum shibynta ban kyntiew ïa ka ktien ka thylliej lajong.
“Kane ka jingpynlong ïa kum kane ka prokram ïakop ka long ka jingpyrshang ban pynneh pynsah ïa la ka jong ka ktien ka thylliej” u la ong.
U la pynkynmaw ruh haba u Myllung Soso Tham u thoh ïa ki poitri um dei ba u thoh tang ban long kata ka jingdeng lane ban pynphuh pynphieng, hynrei u pyndonkam ban thoh ïa ki poitri ban long kum ka ïitkhmih ïa ka jaitbynriew bad kumjuh ruh kan long ka jingmaham ïa ka jaitbynriew.
“U Myllung Soso Tham u pynkynmaw ruh ïa ngi ha kane ka pateng ïa ka jinghiar arsut ka akor ka burom,” la ong u Bah Roykupar.
U la ong ba kine ki jingïakop thoh bad tar ka ai mynsiem ïa baroh ban ïohi ba ki khun samla jong ka jaitbynriew ki ïashim bynta shitrhem ha kane ka jingïakop. “Kane ka pynpaw ruh ba phi sngewsarong ïa la ka jong ka ktien” la bynrap u Bah Roykupar.
Ka HYC ka la ai sngewbha ruh sha ka kynhun Khasi Author’s Society kiba la wan lang ha kane ka prokram bad sha 3 ngut ki nongbishar ha kane ka jingïakop.
