Shillong, K’Lyngkot 16
Ka Sorkar Jylla ka la rai ban wanrah ïa ka kyndon ban pdiang bad pynrung kyrteng ïa ki khynnah pule ‘Private’ na ka bynta ka eksamin Secondary School Leaving Certi-ficate (SSLC) hapoh jong ka Meghalaya Board of School Education (MBoSE).
Hadien ka jingpynïaid ïa ka jingïalang Kynhun Myntri ha ka Sngi Thohdieng, u Myntri Rangbah ka Jylla, u Conrad K. Sangma u la ong, “Ngi la rai ban wanrah ïa ka kyndon ban pdiang bad pynrung kyrteng ïa ki khynnah pule ‘Private’ na ka bynta ka eksamin SSLC hapoh ka MBoSE.”
Kane ka sienjam ka long ban ailad ïa ki khynnah pule ki bym shym la lah ban pyndep ïa ki eksamin matrik lane kiba la sangeh noh shiteng por ïa ka jingpule hadien ka kyrdan Upper Primary ban ïakhun ïa ka eksamin SSLC.
“Ki don shibun ki khynnah pule kiba ha ki por ba la dep kim shym la lah ban pyndep ïa ki eksamin matrik bad ki don ruh bun bah kiba la ieh noh shiteng por ïa ka jingpule hadien ka ‘Upper Primary’ ynda ki la rung ha ka kyrdan pule ‘Secondary’ namar ki daw bapher-bapher,” la ong u Sangma.
U Myntri Rangbah u la ban jur ba katei ka rai kan ai lad ïa ki khynnah pule kiba thrang ban ïakhun ïa ka eksamin SSLC ban ïaid shakhmat bad kata, watla kim shym la lah ban seisoh ha ki jingpyrshang ba hashuwa ne kiba la sangeh noh ïa ka jingpule skul jong ki.
“Ngi kwah ban ai ïa kata ka lad sha ki bad nga tikna ba kan ai mynsiem ïa kiba bun ki khynnah pule kiba na ki jinglong-jingman bapher-bapher kim shym la lah ban seisoh ha ki eksamin matrik jong ki – kin khmih lynti ban ïoh ïa ka lad ban leh ïa kata,” u la ong.
Ïa kane ka jingpynbeit la khmih lynti ba kan ai jingmyntoi ïa bun bah ki khynnah pule ki bym shym la lah ban pyndep ïa ka jingpule ‘Secondary’ jong ki, kaba ailad biang ïa ki sa shisien pat ban pyndep ïa ki eksamin matrik.
