New Delhi, Kyllalyngkot:
Ka BJP ha ka sngi Thohdieng, ka la pyllait paidbah ïa ka por ban jied ïa u President jong ka seng ha ka ri, kaba ong ba ïa ki kyrteng na ka bynta katei ka kam, yn thep ha ka 19 tarik, Kyllalyngkot bad ïa ka kyrteng jong u heh bathymmai jong ka seng, yn sa pynbna ha ka sngi kaba bud.
Katkum ka Organizational Poll Schedule ba la pyllait paidbah da u National Returning Officer ka BJP u K Laxman, la ong ba ïa ka jingjied ïa u khliehduh jong ka seng lah ban thep hapdeng ka por 2 baje janmiet haduh 4 baje janmiet ha ka 19 tarik Kyllalyngkot bad ïa ki kyrteng lah ban weng noh da ki kyrtong hapdeng ka por 5 baje janmiet haduh 6 baje janmiet ha kajuh ka sngi.
Ka jingpeit bniah ïa ki kot ki sla jong ki kyrtong kan long hapdeng ka por 4 baje haduh ka por 5 baje janmiet jong ka 19 tarik u Kyllalyngkot, katkum ka jingpynbna ba la pynmih da u Laxman, uba dei ruh u MP ka BJP Rajya Sabha .
Ka jingthep vote kan long “lada donkam” ha ka 20 tarik Kyllalyngkot bad ka jingpynbna paidbah ïa ka kyrteng jong u President bathymmai jong ka BJP ba la jied kan long ha kajuh ka sngi, la ong u Laxman.
Ïa ka jingthep vote baroh kawei yn pynlong ha ophis treikam jong ka seng.
Katkum ki tyllong khubor na ka seng, la ong ba u National Working President ka BJP u Nitin Nabin u lah ban shah jied khlem da don ba ïaleh pyrshah kum u heh ka seng namar kam long kaba lah ban don kiwei pat ki nongïalam ka seng ki ban ïadon bynta ha kane ka jingïakhun.
Lah ban kdew ba u Nabin un mih noh ha ka jaka jong u J P Nadda kum u President ka BJP, ha kaba ki nongïalam ba hakhliehduh jong ka seng, kynthup ïa u Myntri Rangbahduh jong ka ri u Narendra Modi bad u Myntri ka tnat ki kam pohïing u Amit Shah ki kyrshan ïa ka jingïakhun kyrtong jong u Nabin.
