Jowai, K’Lyngkot 18
Ka West Jaiñtia Hills District ka la sakhi ïa ka jingkiew jong ki kam tuh kali ar shaka, ha kaba ki pulit ki la pynthikna halor ka jingbteng jong kine ki kam runar kiba thmu pyrshah ïa ki kali ki bym don nongpeit bad bym biang ki lad jingïada bad kiba kum kine ki jingjia la ïoh sakhi ruh ha kylleng ki district jong ka jylla Meghalaya.
U Superintendent of Police ka District lyngba ka kyrwoh u pyntip ba hapdeng jong ka miet 16 bad 17 tarik Kyllalyngkot 2026, ki pulit ki la pynlong ïa ka jingtalasi ha Lad Demthring ha kaba ki la pynïeng ïa ki lai tylli ki ar shaka, kawei ka thuk thuk bad artylli ki scooty kiba la kyntait ban ïeng bad phet krad wat hadien ka jingbteng ban ai dak ba kin ïeng.
“Ki pulit mardor ki la pynlong ka jingbeh thong bad tang hadien khyndiat por la lap ïa baroh lai tylli ki ar shaka kiba la shu iehnoh harud surok katba ki nongñiah ki la phet krad sha ka jaka khlaw ba marjan,” ong u SP.
Hadien kane ka jingjia, ki pulit ki la pynlong ka jingkhynra ha ki jaka ba marjan ha kaba ki la ïoh ban bat noh ïa uwei uba la shah kynnoh donkti uba la tip kyrteng kum u Meshanki Langstang ïa uba la batai ba u dei uba la ju mlien ha ki kam tuh ar shaka. Hadien la ïalam noh ïa u sha thanad Jowai na ka bynta ban leh ïa kaba donkam katkum ka aiñ.
Shuh shuh u SP u la pyntip ba naduh ka 1 tarik Kyllalyngkot, 2025 haduh mynta, ki pulit ki la ïoh pdiang haduh 41 tylli ki jingujor kiba ïadei bad ka jingshah tuh ki ar shaka, ha kaba 37 tylli la register case.
Ha kaba kum kane kajuh ka por, la ïoh ban kurup noh haduh 37 tylli ki ar shaka kiba shah tuh ïa kiba la pynphai noh sha ki trai kiba dei hok hadien ba la pynshisha bha bad pyndep ïa ki kyndon aiñ. Haduh 19 ngut ki briew kiba donkti ha kiba kum kine ki kam tuh ki la shah kem noh, bad ka jingshah pynngat ha ka aiñ.
Haba pynmih ïa ka jingai jingmut sha ki paidbah, u SP u la kyntu ïa ki nongshong shnong ba kin long kiba husiar bad shim ïa ki lad jingïada na ka bynta la ki jong ki kali.
“Dei ban pynïeng ïa ki kali ar shaka tang ha ki jaka ba la aibor bad kiba shngaiñ. Dei ban pyndonkam da ki steering lock bad kiwei pat ki tiar ïada ba shngaiñ kum u GPS system bad ruh ban kiar na kaba pynïeng ha ki jaka kiba jngai bad ba kynjah khamtam ha ka por mynmiet,” u la ong.
U SP u kyrpad ruh ïa ki paidbah ba ki dei ban pyntip mardor ïa kino kino ki jingjia shah tuh ne haba don kano kano ka jingsuba sha ki thanad kiba jan tam lane da kaba phone sha u nombor 112.
Haba pynthikna ïa ki nongshong shnong halor ka jingbteng ban shim ïa ki sienjam ban leh tyngeh, u SP u la ong ba ki pulit ka District ki la shim ïa baroh ki lad jingïada, ka jingpyntreikam ïa ki kyndon aiñ bad ki sienjam ban pynthikan ïa ka jingshngaiñ jong ki mynsiem briew bad ki jingdon jingem.
U la ong ruh ba ka jingïatreilang jong ki paidbah ka long kaba kongsan bha ban pynneh ïa ka shongsuk shongshngaiñ, bad u la kyntu ruh ïa ki nongshong shnong ba kin pyntip sha ki pulit lada don kino kino ki jingtip kiba ïadei bad ka jingshah tuh ki ar shaka lane haba don kino kino ki jingsuba sniew.
