Shillong, K’Lyngkot 18
Watla ki Hindu kiba shong ba sah ha Bangladesh ki la shah thombor da kaba shah pynïap ha ki heh paid Muslim hynrei ki rit paid kum ki Khasi kiba shong ba sah ha Bangladesh kam pat don ka jingthombor hynrei ki leh da kawei ka buit ban pom ïa ki tynrai tympew.
Haba ïakren bad u Bah Andrew Sohlamar uba dei u Organising Secretary ka Bangladesh Indigenous People Forum, kaba dei ka kynhun rit paid ha Bangladesh, u la ïathuh ba ka jingshah pynïap ki Hindu ha ki paidbhur Muslim ka dei ka buit ilekshon namar kan long ha ka 12 tarik u Rymp-hang 2026.
U la ïathuh ba ki Khasi kiba sah ha Bangladesh kim pat shah thombor kumba shah thombor ki Hindu hynrei mynshem snem ha u bnai Nohprah ki don ki shnong Khasi ha Moulvibazar district ki la shah pom naphang ïa ki tynrai tympew.
U Bah Andrew u la ïathuh ba ki rit paid ha Bangladesh kim shngaiñ ha kane ka ilekshon namar ki nongïalam jong ki seng saiñpyrthei ki wan beit da ka bor ban byrngem ban kyrshan ïa ki bad lada kim kyrshan ki shah thombor ha kiwei pat ki seng saiñpyrthei.
Shuh shuh u la ïathuh ba ka jingshah thombor ki ritpaid ka dei namar ka Sorkar ba shipor ba la ïalam da u Muhammad Yunus kam da khlaiñ bha ban tehlakam ïa ki kam sniew kumta ki heh paid Muslim ki ïalum shi jaka ban bom shnong ïa ki ritpaid.
U la pyntip ba kito ki jingjia shah bom shnong ki rit paid haduh mynta kam don ka jingbishar namar ka tlot ka jingsynshar.
U don jingkyrmen ba ka Sorkar kaba thymmai ynda la kut ka ilekshon kan wanrah biang ïa ka ri Bangladesh ha ka shongsuk shong shngaiñ.
U la ïathuh ruh ba ki Khasi kim ju sah bad ki Muslim ne ki Hindu hynrei ki sah beit para Khasi ha kawei ka shnong khnang ban tehlakam ïa ka shongkha khleh bad ban suk ka rukom pynïaid shnong.
Kumban shu pynkynmaw, ka jingbym shongsuk shuh ha Bangladesh ka dei naduh ba ka Sheik Hasina kaba dei ka Myntri Rangbahduh ka ri Bangladesh ka la phet noh na la ri ha u snem 2024 namar ka jingmih ki samla pule ban pynlong ka jingïakhih bad mynta ha Bangladesh ki paidbah ki la bunkam ban pynkhreh ïa ka ilekshon ban long ha u bnai ban wan.
