Shillong, K’Lyngkot 18
U Bah Roykupar Synrem, President ka Hynñi-ewtrep Youth’s Council (HYC) u la kdew ba ka jingkren u Myntri Rang-bah ka Jylla, u Conrad K Sangma ba la pyntreikam ïa ka Meghalaya Resi-dents Safety and Security (MRSSA) Act 2016, kum ka atiar ban ïada ïa ka jingrung kyrthep ki briew ba nabar ka dei tang ka jingïalam bakla ïa ki paidbah.
Haba kren sha ki lad pathai khubor u Bah Roykupar Synrem u la ong ba ka MRSSA-2016, kam don ïa ki kyndon ban tehlakam ïa ka jingwan rung kyrthep ki briew ba nabar sha ka Jylla hynrei ka ILP ka don ïa ki kyndon ban ïada.
“Ka jingleh ka Sorkar ka long tang ban shu ïalam bakla ïa ki pidbah ka Jylla,” u la ong.
U la ong ba ka MRSSA-2016 ka dei tang ban register ban ithuh ïa ki briew kiba wan shongwai ha kane ka Jylla kiba mih na kawei ka jaka sha kawei pat. “Ka MRSSA kadei beit thik ban lum ban lang ban kheiñ katno ngut ki don ki nongshong wai ha ki shnong bapher bapher ha Nongbah Shillong. Kumba ka long mynta ka Sorkar ka dang pyntreikam tang katto-kattne tylli ki shnong ha Shillong,” la ong u Bah Roykupar.
“Ngi la ïohi ïa ki jingjia ki bapher-bapher hapoh ka Jylla ban jin lada don shisha kita ki aiñ ban tehlakam bad ban tip ïa ka jingrung ki briew ba nabar sha ka Jylla kin nym jia ki jingjia ba sngewsih kiba ju iai jia ha ka Jylla jong ngi,” u la bynrap.
Shuh shuh u la ong ba kane ka MRSSA-2016 kam don jingïadei eiei bad ka ILP kaba ka seng ka ju ïai dawa man ka por, da kaba ong, “Ngi donkam beit ïa ka ILP bad ba kan don ka por, ban tip ba katno sngi u briew un sah bad mynno u wan rung sha ka Jylla”.
U la ong ba kan don jingmut aiu ïa ka Sorkar Jylla ban pyntreikam ïa ka MRSS-2016 haba kam lah ban tehlakam ïa ka jingwan rung kyrthep ki briew ba nabar.
U Bah Roykupar Synrem u la ong ruh ba ka jingdawa ILP kam dei tang ka jingpyrkhing ïa ki briew kiba na kiwei ki ri hynrei ka dei kaba pyrkhing ruh wat ïa ki nong India haba ki wan rung shapoh ka Jylla Meghalaya.
