Shillong, K’Lyngkot 18
U Myntri Rangbah ka Jylla, u Conrad K. Sangma, u la ong ba ka jingpynlong ïa ka ‘Cabinet Retreat’ ka dei ka jingkynshew bad ym ka jingpynsyrwa kai ïa ka pisa, wat hapdeng ki jingkynnoh na ka liang pyrshah.
“Baroh ki dei ki jingpynlut, hynrei lada phi kylli ïa nga, kane ka dei ka jingkynshew. Kumta, phi lah ban peit ïa kane na kano-kano ka liang. Nga ïohi ba ka jingkynthoh ka don beit, bad nga sngew ba ka long kaba kongsan ïa ngi ban ïohi ïa ka thong kaba ïar,” ong u Sangma ha ki nongthoh khubor hashuwa ban sdang ka jingïalang kaba lai jong ka ‘Cabinet Retreat’ kaba la long ha Orchid Resort, Mawkasiang hapoh New Shillong Township ha ka Sngi Thohdieng.
U Myntri Rangbah u la kdew ïa ki jingmih na ka ‘Cabinet Retreat’ kaba nyngkong eh ha Sohra da kaba ai nuksa ïa ka jingbatai bniah jong ka tnad pule-puthi halor ki nonghikai ‘Adhoc’ bad SSA.
“Ha ka ‘Cabinet Retreat’ banyngkong, ka tnad pule-puthi ka la ai sha ngi ïa ka jingbatai bniah kaba jrong…ngi la shong bad peit ïa kito ki nombor, bad uwei-pa-uwei u Myntri Sorkar, uwei-pa-uwei u ophisar u la peit ïa kane, bad ngi la shim ïa ka rai ban pynbeit ïa ka ha u snem 2025,” u la ong.
U Sangma u la ong ba ka ‘Retreat’ ka la ïalam sha ka jingpynbeit ïa ka jingeh jong ki nonghikai ‘Adhoc’ bad SSA, ha kaba ka Sorkar ka la ïaid shakhmat bad buh por ban weng ïa katei ka jingeh.
“Ngi sngewkmen shi kat dei eh ban ïathuh ha phi ba ngi la poi sha ka jingkut-jingmut. Lada ka ‘Cabinet Retreat’ kam shym la long, lehse ngim pat lah ban ban pynbeit ïa kane,” u la ong.
U Myntri Rangbah u la ban jur halor ka jingdonkam jong kum kine ki ‘Retreat’, da kaba ong, “Nga ieh ha phi ban rai la kine ki jait kam ki long kiba kongsan ne em.”
Ha kajuh ka por, u la kyntu ïa ki nongkynthoh ban long kiba ïohi jngai bad ban khmih ïa ki jingmih na ka ‘Retreat’, ban ïa kaba kynnoh ïa ka kum ka jingpynlut ba pynsyrwa kai ïa ka pisa.
Na ka liang u Sangma u la ong ba ka jingïalang bai-lai jong ka ‘Cabinet Retreat’ ka la ïaid shakhmat, da ka jingthmu ban pynïahap ïa ki jingthmu bad ki thong jong ki tnad treikam bapher-bapher ban pynurlong ïa ki jingthmu ba kham heh jong ka Jylla.
“Man la ka ‘Cabinet Retreat’ ka don ïa ka phang kaba pher na ka, hynrei ka jingthmu ba kongsan ka long ban pynïahap bad ka jingthmu ba kham heh jong ka Sorkar Jylla kumjuh ban sngewthuh ïa kaei kaba man la kawei-pa-kawei ka tnad treikam ka leh,” u la ong.
U Myntri Rangbah ka Jylla u la pynshai ruh ba kane ka ‘Retreat’ ka dei ka lad ïa ki ophisar bad ki Myntri ban sngewthuh ïa ki prokram pynroi bad ki kam jong ki tnad treikam bapher-bapher.
“Kum ka nuksa, ha ka tnad PHE donkam ban tip kiei ki prokram pynroi kiba la jia ha ka tnad ‘Water Resources’, ‘Soil & Water Conservation’, ha ka tnad tih marpoh khyndew, ha ka tnad khlaw – namarba ka don jingïadei bad ka um,” u la ong.
Ka ‘Retreat’ ka pynleit jingmut ha ki shiphew tylli ki jingkular bad shiphew tylli ki lad ba la buh ha ka ‘Vision 2028’ bad ‘Vision 2032’ jong ka Jylla.
“Ngi pyrshang ban pynshai sha ki paidbah ba katba ngi dang seisoh bad ngi dang trei ban pynurlong ïa ka ïoh ka kot kaba 10 ‘Million Dollar’ bad 16 ‘Million Dollar’ ha u snem 2032, kumno ka kam jngohkai pyrthei ka don bynta, kumno ka tnad PWD ka don bynta,” la ong u Sangma.
Shuh shuh u Myntri Rangbah u la ban jur halor ka jingdonkam jong ka jingïatreilang bad ka jingïakren kaba laitluid hapdeng ki tnad treikam bapher-bapher.
“Ki heh ophisar ki laitluid ban kylli kano-kano ka jingkylli bad ki laitluid ruh ban ai kano-kano ka jingai jingmut. Ka long kum ka lad ha kaba ki ophisar Sorkar ki lah ban ai jingmut namar teng-teng ki buit kiba paka tam ki wan na ki nongshong shnong,” u la ong.
