Shillong, K’Lyngkot 18
U Saleng A Sangma MP ka Lok Sabha ka Tura Parliamentary Constituency, u la kynnoh ba ka Executive Committee (EC) ba la lam khmat da ka National People’s Party (NPP) ha Garo Hills Autonomous District Council (GHADC ) ka la pynduh jingkyrmen ïa ki paidbah ka Ri-lum Garo, naduh ba ka Sorkar Jylla ka la siew tulop hi ïa ki nongtrei jong ka Council.
U Saleng u la ong ba ka jingshim rai ba kyrkieh jong ka Sorkar ban siew tulop hi noh ïa ki nongtrei jong ka Council, ka dei ka kam mushlia ïa ki kam bad ki bor ba laitluid jong ka Council da kaba ong ruh ba ki paidbah ka Ri-lum Garo mar ïa pynbna ïa kane ki sngewthuh ba ka EC jong ka NPP kam lah ban pynïaid ïa ki kam jong ka Council ha GHADC.
“Ki Autonomous District Council la bynta ba ki dei ban pynïaid hi ïa ki kam jong ki katkum ki jinglah jong ki ban pynmih pisa, kumba long ka Khasi Hills Autonomous District Council kaba la kyntait ïa kane ka jingtyrwa ban siew tulop hi noh ka Sorkar,” la kdew u Saleng.
Shuh-shuh u la ong, haba ka Sorkar ka la pynbna ba kan siew tulop hi noh ïa ki nongtrei jong ka Council, ka paw shai kdar ba ki bor synshar hapoh District Council kim shym la lah ban synshar bad ban pyntyllun ïa ki kam, nalor kata ruh ka NPP kam shym la lah ban ai ïa ka jingshakri ïa ki paidbah jong ka Ri-lum Garo.
“Ka EC jong ka GHADC ka tlot shaba palat, ki rukom pynïaid ïa ki kam synshar khadar ki la phiel bad kam don kaei-kaei kaba ngin sngewsarong….. bad kane ka lah ban don kaei re kaei kaba na sha lyndet,” la ong u Saleng.
Nalor kata u la bynrap ruh da kaba ong ba, ïa ka pisa la phah da ka Sorkar pdeng na ka bynta kiba bunjaid ki jingsiew ba da ki klur tyngka ha kaba ïadei ka roi ka par, hynrei shaei kane ka pisa ka jah… kane baroh ka dei kaba ki pyrshang ban tap eit miaw ïa ki jingleh barieh jong ki hapoh District Council.
“Ngam pat ju ïohi ha ki por ba la dep ba ka Sorkar Jylla kan siew tulop hi ïa ki nongtrei hapoh District Council, ho-oid ka biang eh, nga sngewtynnad ba ki siew tulop ïa ki nongtrei jong ka Council, hynrei hato phi shim na ka pla tyngka ka Sorkar Jylla ne nangno…..?” la ong u Saleng.
