Kolkata, Kyllalyngkot:
U Myntri Rangbahduh ka ri u Narendra Modi ha ka sngi Saitjaiñ u la thombor jur ïa ka sorkar Trinamool Congress ha West Bengal, da kaba kynnoh ba ka jingwan buhai shnong kaba jur ka la pynkylla ïa ka jingbun briew jong ka jylla, ka la pynmih ïa ki jingkulmar ha ki distrik kum ka Malda bad Murshidabad, bad ka la roi namar ka kynhun ki nongsynshar syiem.
Haba kren ha ka jingïalang hangne, u Modi u la ong ba ka jingwan rung tuh ka buh kawei na ki jingeh kaba khraw ha khmat ka jylla bad u la pynskhem ba wat ki ri kiba roi ha kylleng ka pyrthei ki shim ïa ki sienjam kiba tyngeh ban ithuh bad beh noh ïa ki nongwan buhai shnong beaiñ.
“Ka jingwan buhai shnong ka dei ka jingeh kaba khraw bha hakhmat ka Bengal. Ki don ki ri kiba la kiew bad kiba roi ha ka pyrthei ki bym duna pisa, pynban ki dang pynduh ïa ki nongwan buhai shnong. Ka long barabor kaba donkam ban weng noh ïa ki nongwan buhai shnong na West Bengal”, u la ong, haba pynïadei ïa ki jingjia thombor ba dang shen ha Malda bad Murshidabad bad ka mat.
U Myntri Rangbahduh u la kynnoh ba ka rukom treikam jong ka TMC ka kynhun treikam ban pynthikna ba ki nongwan rung tuh ki shah pynshong shnong ha Bengal, kaba la wanrah ïa ka jingkylla ha ka jingbun briew ha kiba bun ki jaka.
Haba wad ban pynsngewskhem ïa ki jaitbynriew Matua kiba don jingmut ha ka saiñ pyrthei, kiba la wan buhai shnong sha India na ka ri ba marjan jong ka Bangladesh hadien ba ki la mad ïa ka jingshah pynshitom beiñ ha ka niam, u Modi u la ong, “Nga kwah ban pynthikna ïa ki nongphetwir kum ki Matua kiba la leit rieh tngen ha India namar ka jingshah pynshitom beiñ ha ka niam: phim donkam ban khuslai.”
