Khliehriat, K’Lyngkot 18
Uwei u bar jylla, la ong ba u la khlad ha ka por ba dang trei ha kawei ka par dewïong kaba don ha Umthe, Elaka Sutnga, East Jaiñtia Hills District.
Katkum ka jingïathuh jong ki pulit, ïa utei u bar jylla la tip kyrteng kum u Mosaid Ali, 48 snem na ka shnong Jamuna Moudanga Nagaom, Hojai District, Assam.
Haba ïadei bad kane ka jingjia, ki pulit kila kem noh ïa uwei u briew uba kyrteng u Sahanaj Uddin, na Bhairabpur Pt- II, PO Kalain, District- Cachar, Assam bad ba ki pulit kin sa rah ïa u sha ïingbishar lashai ka sngi bad kin sa pan jingbit na ka ïingbishar ban pynlong jingtohkit da ki pulit ha along ki pulit.
Halor katei ka jingjia la pyntikna ruh da u Superintendent of Police ka East Jaiñtia Hills District, u Vikash Kumar, IPS bad ong ba kane ka jia myn ha ka 14 tarik Kyllalyngkot bad ba utei uba la khlad, ula khlad noh ha katei hi ka sngi ba jia.
Shuh shuh u la ong, katkum ka jingshitom jong utei uba la khlad la ong ba ka lah ban don kaei kaei kaba khia kaba hap halor jong u haduh ba la kheiñ ki shyieng bad pei ka snier jong u.
Halor kane, u Superintendent of Police u la phah pulit sha katei ka jaka ban khang noh ïa katei ka jaka tih dewïong kaba long pyrshah ïa ka aiñ bad halor kane ka jingjia na ka liang ki pulit ruh ki la register ejahar ha thanad Khliehriat.
