Shillong, K’Lyngkot 18
Ka XX Annual Convention jong ka Commission for Women Nongstoiñ Diocese ka la long ha Nativity of our Lord, Parish Mawkyrwat halor ka phang ‘To Kyrmen da ka jingkmen, to ïaishah ha ka jynjar to minot ban duwai.
La sdang ïa kane ka sngi ba khraw ki Longkmie da ka Mass bakhuid ha kaba u Bishop ka Nongstoiñ Diocese u Most Rev Bishop Wilbert Marweiñ DD u la long u nongkñia Rangbah, ha ka jingdonlang ki Lyngdoh na ki Parish bapher-bapher.
Haba pharia ïa ka ktien u Blei u Most Rev Bishop Wilbert Marweiñ u la ïathuhkhana shaphang kawei ka Longkmie kaba don 7 ngut ki khun kaba la shitom jur bad hadien kata ka la dkut mynsiem bad katba kiba ha ïing ha sem ki dang mut ban pynsum kawei ka kjat ka dang syaid bad kim shym la pynsum shuh ki la ap shuwa, kane ka Longkmie ha kata ka jongïaid lynti jong ka, ka la poi sha kawei ka jaka ha kaba uta u nongap u khlem shah ïa ka ban rung, u la phah ïa ka ban leit phai noh na ka lynti kaba ka wan.
Hadien ba ka la wanphai biang bad kyndit bynriew ka la kylli balei ba ïa bun briew bad haba ki la ïathuh ïa kaei kaba jia, kane ka Longkmie ka la ïathuhkhana halor ka jingïaid lynti jong ka. U Bishop u la kyntu Kynpham ïa ki paid riewngeit baroh ba ki dei ban kynmaw ha ka jingïaid lynti teng-teng ngi ïaid ha ka jingdum bad haba ngi ïaid sha khmat ngi poi sha ka jingshai.
U la ong ba dei lyngba ka jingshai kaba wanrah ïa ka jingim kaba phuhmut phuhmat, kum ki longkmie phi la ïohi ïa ka jingkylla ha ka por ba phi dang samla bad ha kane ka por ba phi la longkmie.
Ngi ïohi ïa ka jingkylla ha la ka jong ka jong ka jingïohi bad ka jingïohi ka ïa pher i wei na i wei pat.
“Haba ngi phai dien ngi ïohi ïa ki jingbha ki jingsniew bad ki jingïakynduh bapher-bapher,” u la ong.
Shuh-shuh u la ong ngi ïohi ïa ka pyrthei kaba kmen, ka pyrthei kaba don ha ki jingïaleh bad u Blei un btin lynti. U la kitbok kitrwiang ïa ki longkmie ba kin lah ban treibha shuh-shuh ha kine ki sngi ban wan.
Ha kane ka sngi la pynkup burom ïa u Bishop u Most Rev Bishop Wilbert Marweiñ, u Spiritual Director u Fr Silvester Nongsiej, ki phadar baroh kiba ïashim bynta, ki Nongïalam barim ka Commission kiba la trei shitom bad kumjuh ruh ïa ki Nongïalam ka seng Longkmie ka diocese.
Ha kane ka sngi la pynhiar noh ïa ka lama jong ka synjuk bad la aiti ïa ka sha ka Parish ka ban sa pynlong ha u snem ban wan kata sha ki Nongïalam ka seng Longkmie ka Parish Nongjri.
