Shillong, K’Lyngkot 18
Ka Kynhun Myntri ka Jylla ka la mynjur ïa ka ‘Meghalaya Border Area Development Service Rules 2025’.
Haba kren sha ki nongthoh khubor hadien ba la wai ka jingïalang, u Myntri Rangbah ka Jylla, u Conrad K. Sangma u la ong, “Ki kyndon shakri na ka bynta ka tnad Meghalaya Border Area Development la mynjur da ka Kynhun Myntri. Kine ki dei ki kyndon kumba ju long, kiba donkam ban mynjur da ka Kynhun Myntri khnang ba ki bynta bapher-bapher jong ka jingpynkiew kyrdan bad ka jingshakri kin long kiba shai.”
Katkum ka jingong jong u, ka jingmynjur ïa ki kyndon shakri la khmih lynti ban wanrah ïa ka jingshai ha ki liang bapher-bapher jong ka jingshakri kumjuh ka jingkiew kyrdan na ka bynta ki nongtrei jong ka tnad Border Area Development.
Da kaba pynshong nongrim ïa kata, la bthah ïa baroh ki tnad treikam ba kin wanrah ïa la ki jong ki kyndon shakri (Service Rules), u la bynrap.
