Mawkyrwat, K’Lyngkot 18
Ki paidbah ka shnong Rangmaw ryngkat ki bahaïing hasem bad ki pulit ka Mawkyrwat ki la lap noh ïa ka met ïap jong u samla Khlainkupar Nongsiej ba dang 22 snem, u samla uba don ka jingduna ha ka bor pyrkhat uba la jah noh naduh ka 13 tarik.
Ka jingsiew tulop ka Sorkar ha Kyllalyngkot 2026 na Rangmaw, South West Khasi Hills District.
Ïa ka met ïap jong u Khlainkupar Nongsiej la lap da ki paidbah nongshong shnong ryngkat ki pulit ha ka 17 tarik u Kyllalyngkot 2026 ha ka por kumba 2:00 baje eiei nohphai sngi na ka Thwei Kyndan kaba don ha wah Umngi.
Kum ban shu kdew, u samla Khlainkupar Nongsiej uba na ka shnong Rangmaw, Maharam Syiemship ha South West Khasi Hills District u la mih na la ïing ha ka 13 tarik u Kyllalyngkot 2026 ha ka por kumba 11:30 mynstep bad naduh katei ka por um shym la wan phai shuh sha la ïing bad dei hadien san sngi ba ki la pynlong ïa ka jingwad shnong ba la lap noh ïa ka met jong u.
Ha kaba ïadei bad katei ka jingjia, na ka liang ki bahaïing hasem ki la pan jingkyrpad ban pyllait ïa ka post mortem namar kim don kano kano ka jingsuba sniew bad ïa ka met jong u Khlainkupar Nongsiej la aïti noh sha ki bahaïing ba kin pyndep ïa ka jinglehniam ba khatduh.
