Jowai, K’Lyngkot 17
Ki nongkitkam bad dkhot ka Congress bad Voice of the People Party (VPP) nalor kiwei ki seng saiñ pyrthei na Nongkhroh kaba hap hapoh ka 1-Nartiang Constituency kila pynïasoh ïalade bad ka National People’s Party (NPP).
Ïa kine ki nongkitkam bad dkhot na ki seng saiñ hima, kiba don kumba 17 ngut kynthup shynrang bad kynthei la pdiang burom ïa ki da u National General Secretary ka NPP bad Symbud Myntri Rangbah ka Jylla u Ma Sniawbhalang Dhar ha ka ïingsah jong u ha ka 17 tarik Kyllalyngkot.
“Mynno mynno ruh ngim pat ju kyrshan ïa u Ma Sniawbhalang Dhar, hynrei haba peit ïa ki kam bad ka roi ka par kaba u la leh hapoh ka konstitwensi bad hapoh ka shnong ka thaw, kala pynlong ïa ngi ba ngin wan ïasoh noh bad ka NPP,” la pynpaw ki nongkitkam na ka Congress bad VPP.
U Ma Sniawbhalang Dhar haba pdiang sngewbha ïa ki, u la ong, “Naduh mynta ka sngi phi la dei ki jong nga bad nga dei u jong phi, kiei baroh kiba la dep ngin klet noh hynrei ngin ïatreilang nangne shakhmat na ka bynta ka bha ka miat bad ka roi ka par jong ka shnong ka thaw”.
Kitei ki nongkitkam bad dkhot na Nongkhroh, ki kynthup ïa u Homi Mukhim, Nomistar Nongbri, Dibishor Marboh, Banteilang Mynsong, Dansing Kharsati, Shanbiang Marboh, Piius Nongrum, Swer Nongrum, Damistar Kharummuid, Dli Marboh, ka Kong Aibiril Marboh, Shailin Khmah, Ri-ieitlang Marboh, Rihun Mynson, Olti Kharbikhiew, Dari Marboh bad Marbon Khmah.
