Shillong, K’Lyngkot 18
Ka jingïatiplem, ka jinglong khuid mynsiem bad ka jinglong shida ha ki jingmut jingpyrkhad ha kine ki sngi ka la hiar bha, hynrei dang don pat ki briew kiba dang khlaiñ ka jingïatiplem bad jinglong hok, khlem da pyrkhat ïa ka myntoi shimet ban ïoh spah da kaba suk khlem da trei shitom.
Ha kawei ka khubor ba sngewtynnad ba u nongtrei ha kawei ka Petrol Pomp u la ïoh tam ïa ka song pisa ba la kum pynhap da ki nongwan thied umphniang ha katei ka jaka thep umphniang kaba u trei bad haba u ïoh tam ïa katei ka song pisa kaba duna ne tam ïa ka T. 50,000 u la leit ban aiti ha ki nongpynïaid jong katei ka Pomp.
Kane ka la jia ha ka Petrol Pomp kaba tip kum ka D’mercy Refill Centre, Laitjem Upper Shillong ha ka 16 tarik Kyllalyngkot 2026 ha ka por 10:30 janmit ba la lah ban ïohi lyngba ka jingdon ka kor CCTV ba ha katei ka por, ka wan kawei ka kali rongsaw kaba don ïa u number ML 05 X 8558. Ha kaba u nongniah jong katei ka kali u la mih na kali bad ïohi ba katei ka song pisa ka la hap sha madan.
Utei u nongtrei ha katei ka Petrol Pomp haba u la ïoh tam ïa katei ka song pisa u la leit ban aiti sha ki nongpeit jong katei ka Pomp, ha kaba u Manager u Bah Renald Khyriem u la ai ka jingïaroh ïa utei u nongtrei uba u don ïa ka mynsiem ïatiplem bad khlem da kwah myntoi ïalade.
U Bah Renald u la pyntip ba kiba dei trai jong katei ka pisa kin phone ha ki number 7085051166 lane 7005067535 na ka bynta ban pynbeit bad ba kin ïoh ban pynphai ïa katei ka pisa sha kiba dei trai.
Kane ka jingbha bad ka jinglongshida jinglong utei u nongtrei ha katei ka Petrol Pomp kan long ruh ka nuksa bha ïa iwei pa iwei ban im ka jingim ba bha bad khlem da kwah myntoi ïa kaba ymdei hok bad haba leh ïa ki kam babha ki jingkyrkhu kin wan na sha lyndet.
