Patna, K’lyngkot:
Ki pulit ka Bihar kin pynkhreh ïalade da kaba pyndonkam da ki drone kiba mynta ban pynkhlaiñ ïa ka jingpeitngor bad ka kam pulit ha kylleng ka jylla.
Khnang ban nang pynkhlaiñ shuh shuh ïa ka bor na ka bynta ka kam pulit kaba kham bha, ki pulit ka jylla ki la rai ban thied 50 tylli ki drone hapoh u bnai Lber, 2026, ong u Additional Director General of Police (ADG) (Modernisation) u Sudhanshu Kumar ha ka sngi Thohdieng.
Man la ka distrik kan ïoh ym duna ïa kawei ka drone, kawei kawei ka lah ban sah ha suin haduh 45 minit. Nalor kata, yn thied 10 tylli ki drone kiba bha tam na ka bynta ka Special Task Force (STF) ban leh ïa ki jingpahara ha ki jaka ba don harud wah, la ong u Kumar da kaba bynrap ba la mang T.25 klur na ka bynta kane ka jingthmu. Ka komiti kaba donbor bha ka la ai ïa ka jingmynjur ha ka 14 tarik u Kyllalyngkot, u la bynrap.
“Ka dei ka plan kaba thrang bha katkum kaba ki pulit ka jylla kin sa thied ïa ki drone.Ngi kyrmen ban thied ïa ki drone ha kaba kut jong u bnai Lber mynta u snem,” ong u ADG da kaba bynrap ba yn pyntreikam ïa ki pulit da ki drone hadien ba la ai jinghikai kaba biang.
Da kaba pynpaw ba ïa ki jingshakri jong ki drone la pyndonkam bha na ka bynta ar tylli ki jingthmu, u la ong ba ïa ki drone la pyndonkam na ka bynta ban pynneh pynsah ïa ka shongsuk shongsaiñ bad ban tehlakam ïa ki paidbah, nalor ba la pyndonkam da ka STF na ka bynta ban peitngor kham bha ban peit bniah ïa ki kam runar ba la pynbeit ryntih ha ki jaka ba don harud wah.
Ki drone kiba ki pulit ka jylla ki thmu ban thied yn pyndap da ka ANPR (Automatic Number Plate Recognition) system, ka ban ïarap ban peit ïa ki jingpynkheiñ aiñ ïaid kali.
Kumba ka long mynta, ki pulit jylla ki la pyndonkam ïa ki drone na ki tnad shimet, kiba shim bai lutksan na ka tnad man ka kynta na ka bynta ka por ba ka drone ka sah ha suiñ. Hynrei mynta ka tnad ka la rai ban don la ka jong ka lieng na ka bynta ka jingtreikam pulit kaba kham bha, u la ong.
Shuwa ban thied ïa ki drone, ki pulit ka jylla ki la pynlong ïa ka jinglehkai kaba bniah. “Ngi la ïakynduh ïa ki jylla ba ki pulit ki ju pyndonkam ïa ki drone.Ngi la ïakynduh ruh ïa ki kynhun kiba pynbiang ïa ki drone sha kum kine ki jylla bad, katkum ka jingdawa jong ki pulit ka jylla, ngi la pynkut noh ïa ka jingthmu,” u la ong.
Nalorkata, kum shibynta jong ka jingthmu jong ka ban buh ïa ki CCTV ha baroh ki police station ha kylleng ka jylla, ryngkat bad ki Dashboard, ka sorkar pdeng ka la mynjur T.112.46 klur na ka bynta kane ka jingthmu. U Kumar u la ong ba ka jingbuh ïa ki Dashboard kan pynlah ïa ki heh pulit ban peit bniah ïa ka jingtreikam jong ki CCTV ba la buh ha ki police station ha ka por ba shisha.”Ha kiwei pat ki kyntien, kan pyni la ka CCTV ka treikam ne em ha kawei ka thanat pulit,” la bynrap biang u ADG.
Ka sorkar ka la mang ruh haduh 23.58 klur tyngka ha une u snem mang tyngka ba mynta na ka bynta ban buh ia ki CCTV ha ki ïing sorkar kum ha Secretariat barim bad kiwei kiwei ki ïing Secretariat, kiba kynthup ïa ka Vikas Bhawan, Vishweswaraiya Bhawan, Soochna Bhawan, Sinchai Bhawan bad u Kudhihan Bhawan, la ong u Kudhihan Bhawan.
Shuh shuh, hadien ka jingpyntreikam ïa ki lai tylli ki aiñ pynshitom beiñ kiba thymmai – ka Bharatiya Nyaya Sanhita (BNS), ka Bharatiya Nagrik Suraksha Sanhita (BNSS) bad ka Bharatiya Sakshya Adhiniyam (BSA) – kiba buh jingmut kyrpang ïa ka jingpyndonkam ïa ki “Forensics”, ka sorkar pdeng ka la ai jingmynjur ïa ka pisa kaba T. 162 klur na ka bynta ban wanrah ïa ki 7 tylli ki Forensic Science Laboratories (FSL) ki bathymmai bad na ka bynta ka jingpyntreikam ïa ki saw tylli ki FSL kiba la don lypa ha Patna, Muzaffarpur, Bhagalpur bad Purnea.
Ïa ka pisa la mynjur hapoh ka “Scheme for Modernisation of Forensic Capacities”, u la bynrap.”Ki jingtei jong ki hynñiew tylli ki FSL kiba thymmai ki la long kiba la pynkhreh bad ngi kyrmen ban pynlong treikam ïa ki ha u bnai Lber ban wan,” la ong u ADG.
