Shillong, K’Lyngkot 19
Watla ka la don ka jingkhang pyrshah ïa ka jingkhaïi tuh ne beaiñ ïa ki dohkha ba la wanrah na Bangladesh, hynrei la jingïoh jingtip ba kane ka kam khaïi tuh ïa ki dohkha na Ri Bangladesh lyngba ki jaka khappud kum ka thaiñ Shella, Lawbah, Dawki bad kiwei-kiwei ka dang don, haduh ba ka la ktah kylla ïa ka kam ri bad khaïi dohkha da ki trai ri trai muluk kaba la wanrah ka jingbitar namar ka jingduhnong.
Katkum ka khubor la ong ba ha ka step 19 tarik u Kyllalyngkot, 2026, katto katne na ki nong- khaïi dohkha bad ki samla kiba im da kane kam ki la ap bad bat ïa ki kali Pick-Up ba kit dohkha ha ki bynta ka Upper Shillong.
Ka jingbat ïa kine ki kali kit dohkha ka long tang ban shai la kine ki dohkha ki dei kiba wan naei. Haba ki nongkhaïi bad ki samla ki la kylli, bun na kiba ñiah kali kim batai shai mano ki trai bad kim don ruh ïa ki kot ki sla lane ki Challan.
Don napdeng kiba ñiah kali kit dohkha kiba don ruh ki bar jylla, ki ïathuh ba ki wan na ki thaiñ Mawsynram kum na sha Lawbah nangta na Shella, Dawki bad kiwei kiwei ki jaka ba don khappud bad ka Ri Bangladesh bad ki nongkhaïi ki sngewthuh ba ki dei kiba wan rung na katei ka Ri.
Shuh shuh la don ruh ki nongñiah kali kit dohkha kiba la mynjur ba ki dei kiba wanrah na Bangladesh. Kane ka jingïoh ban khaïi tuh ïa ki dohkha na Ri Bangladesh ka pyntroin ïa ka kam khaïi dohkha ki trai ri trai muluk wat hapdeng ka jingangnud ka Sorkar Jylla ban pynkhlaiñ ïa ki.
Ha ka jingwad bniah la shem ba ka la don ruh ka jingpynbna na ka tnad Fisheries ka Sorkar Jylla lyngba ka Under Secretary ha ka 27 tarik u Nohprah, 2025 sha ki Deputy Commissioner jong ki District bapher bapher halor ka phang ka jingkhaïi beaiñ ïa ki dohkha na Ri Bangladesh kaba kyntu ïa ki bor pynïaid District ban teh lakam.
Ïa kane ka jingpynbna la phah copy sha u Myntri ba dei khmih ïa ka tnad, Director ka tnad bad kumjuh sha u Chief Organising Secretary ka FKJGP Central Body, Fish Department.
Kumba long mynta la don ki bor district kiba la pynmih hukum halor kane da kaba pynjari da ka kyndon aiñ kaba 163 BNSS, 2023 kaba khang pyrshah ïa ka jingwan shalan beaiñ, ne pynïaid ïew tuh ïa ki dohkha kiba la wan kit na Bangladesh, khlem ki kot ki sla kiba biang.
La maham ruh ïa ka jingpyndonkam ïa ki kali, ki lieng bad kiwei kiwei ki tiar ha ka ban kit bad shalan ïa ka dohkha bad ruh ïa kito ki riew shimet ne ki kynhun kiba don bynta ha ka ban pynïaid ïa kane ka kam beaiñ.
Ïa kane ka aiñ la pynjari hadien ka jingdon jong ka jingkhaïi tuh bad pynïaid ïew ïa ki dohkha na Bangladesh ha kiba bun ki jaka khappud bad wat ha ki ïew ki hat.
La ong ba namar kane kan ktah ïa ka kamai kajih jong ki nongshong shnong, ka ktah ïa ka shongsuk shongsaiñ bad ka buh jingma ruh ïa ka jingshngaiñ jong ka ri.
Shuh shuh la kdew ba kino-kino kiba ïaleh pyrshah kin ngat ha ka jingshah pynsaja katkum ka kyndon aiñ 223 BNSS Act, 2023, bad kiwei ki kyndon aiñ kum ka BNS, Custom Act, Foreign Act, Passport Act bad kiwei-kiwei.
