Shillong, K’Lyngkot 19
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ka jingshah tuh jong ki arshaka bad kiwei-kiwei ki tiar ki tar na kylleng ki bynta jong ka Jylla.
Katkum ka khubor na ki pulit la ong ba u Raju Singh u la ai ka jingujor ba ha ka 16 tarik mynta u bnai ha ka por mynsngi, ki runar bym lah ban ithuh ki la tuh ïa ka arshaka ka jong u kaba don ïa u registration number ML05-V-5390 na Arbuthnot Road, Laitumkhrah, Shillong.
Kumjuh ruh ka Kong Lajong I Tyngkra ka la ai ka jingujor ba ha ka miet jong ka 16 tarik mynta u bnai, ki runar bym lah ban ithuh ki la tuh ïa ka arshaka ka jong ka, kaba don ïa u registration number ML04-E-1159 na ka jaka sah jong ka, kaba don ha Ionglwit, shnong Nongjngi ha West Jaiñtia Hills.
U Mechwa Myria ruh u la ai ka jingujor ba ha ka 17 tarik mynta u bnai, ha ka por kumba 4 baje dang step, ki runar bym lah ban ithuh ki la tuh ïa ka arshaka ka jong u kaba don ïa u registration number ML05-AD-0558 na ka jaka sah ka jong u, kaba don ha shnong Nartiang ha West Jaiñtia Hills.
Na ka liang jong u Goukhanlian ruh u la ai ka jingujor ba ha ka miet jong ka 14 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AB-1232 na ka jaka sah ka jong u, kaba don ha Rngi Neng, Lawjynriew, Nongthymmai, Shillong.
Ha ka 16 tarik mynta u bnai hapdeng ka 12 baje shiteng synñia haduh 4 baje mynstep, la lap ba kawei ka arshaka kaba don ïa u registration number ML05-AA-6956 kaba dei jong u Rumo Dkhar, ka la jah na ka jaka pynïeng kaba don habar ka ïing sah jong u, ha Kynton, Khliehtyrshi ha West Jaiñtia Hills.
Ha kawei pat ka khubor, u Monen T Sangma, Secretary jong ka JJM, Rukalgre ha East Garo Hills u la ai ka jingujor ba ha ka 13 tarik mynta u bnai, ki runar bym lah ban ithuh ki la tuh ïa ki ar tylli ki solar panels kiba la pyndait hapoh ka shnong hapoh ka JJM.
Na ka liang jong ka Nilufa Begum, kaba dei ka Security & Vigilance Team jong ka Indus Tower Ltd., ka la ai ka jingujor ba ha ka 13 bad 14 tarik mynta u bnai, ki runar bym lah ban ithuh ki la prong tuh hapoh ka Telecom site kaba don ha Mawsynram, East Khasi Hills bad ban tuh ïa ki cables, CCTV bad kiwei-kiwei ki tiar.
Na ka liang jong u Channel Manager, SBI, RBO, Shillong Urban Region-I, Shillong u la ai ka jingujor ba ha ka 14 tarik mynta u bnai, ki runar bym lah ban ithuh ki la pynpra ïa ka kor ATM jong ka SBI kaba don ha Puja Mandap, R&R Colony, Rynjah, Shillong bad ban rah tuh ïa ki UPS battery.
