Shillong, K’Lyngkot 19
U Myntri Rangbah ka Jylla, u Conrad K. Sangma ha ka Lah Sngi U Blei u la plie ïa ka jingdro-dur tynrai Khasi (Khasi Traditional Mural) ha Rymbai Fuel Station, Mawlai Mawïong Rim.
Haba kren ha kane ka sngi, u Conrad, haba ai khublei ïa ka Seng Samla Mawlai Pyllun (SSMP) halor ka jingkynjoh ïa u mawmer ba arphew snem jong ka jingshakri bad jingnoh synñiang ka seng sha ka Mawlai, u la ong ba ki don katto-katne ki nongrim kiba pyntyllun ïa ka rukom treikam jong ka Sorkar bad ka nongrim kaba kongsan tam ka long ban pyntikna ïa ka jingshimkhia ïa ki bynta bapher-bapher jong ka imlang-sahlang.
“Ki samla jong ka imlang-sahlang ki dei ka bynta ba kongsan tam bad ki kynhun bapher-bapher ha ki shnong ki thaw kum ki Seng Samla ki long kiba kongsan ym tang na ka bynta ka lawei hynrei na ka bynta ka por ba mynta jong ka Jylla jong ngi,” ong u Conrad.
U Myntri Rangbah u la kyntu ruh ïa ki samla ba kin shim kabu ïa ki prokram bad ki skhim jong ka Sorkar Jylla kiba la thmu kyrpang na ka bynta ki samla ka Jylla haba ïadei bad ka roi ka par jong ki, jingkyntiew bad jingïatreilang jong ki – nalor ka jingpynbiang ka Sorkar ha ka liang ki sap ki phong, ki rynsan bad ki lad ki lynti bapher-bapher kiba donkam.
“Ka khubor kaba nga kwah ban ai mynta ka sngi ym tang sha ki samla ka Mawlai hynrei ka Jylla baroh kawei ka long ba ka pyrthei mynta ka dap da ka jingïakhun (competitive) bad katba ngi dang don ïa ki kyndon ka Riti Synshar ka Ri jong ngi ban ïada ïa ki hok jong ngi, to ngin ym long kiba kheiñ sting hynrei ban pynkhreh ïalade ban ïakhun bad kiba tbit tam ha ka pyrthei,” u la ong bad bynrap, “Nga kyrmen ba kane ka jingrakhe dap lyngkhuh snem jong ka SSMP kan ai mynsiem ïa ki samla ban long ka jingkylla,” u la ong.
Haba pynkut ïa ka jingkren jong u, u Myntri Rangbah u la ong ba ka jingdro dur tynrai kaba pyni ïa ka kolshor jong ki Khasi kan long ruh kum ka jingkhring dur bad ka jingpdiang sngewbha ïa ki nongwan jngohkai pyrthei kiba wan rung sha Shillong.
Ha kane ka sngi, na ka liang ka Dorbar Shnong, kynhun Seng Samla ki la aiti ïa ki dorkhast sha u Myntri Rangbah ka Jylla kiba la pynpaw ïa katto-katne ki jingeh bad jingdonkam jong ka thaiñ Mawlai.
