Shillong, K’Lyngkot 19
Ka Jylla Meghalaya ka la jop ha ki 3 tylli ki National Award ha ka 6th Digital Transformation Summit & Awards kaba la long ha New Delhi, kine ki jingithuh ïa ka jingtbit ki kynthup ha ka Geospatial Technology, Digital Governance bad Public Service Delivery.
Kine ki jingïoh jingithuh ka Jylla Meghalaya ka paw ba ka Jylla ka la kiew shaphrang haba ïadei ki jingleh ïa kiei-kiei kiba thymmai lyngba ki kor teknoloji ha ka jingïalam u Myntri Rangbah u Conrad K Sangma kum ki kam pynroi ha sor bad ka jingthmu ban ai ka jingshakri ïa ki paidbah, ka koit ka khiah, pynpaw ka kyrwoh khubor na ka Planning, Investment Promotion and Sustaina-ble Development Depart-ment.
Haba ïadei bad ka Planning, Investment Promotion and Sustain-able Development Depart -ment, Meghalaya ONE, ka la ïoh ïa ka jingithuh ha ka kyrdan “Innovative Use of Digital Technology in Enhancing Public Service Delivery.” Ka Meghalaya ONE ka dei ka rynsan digital kaba pyntip ïa ki paidbah nongshong shnong ban ïoh jingtip ïa ki skhim Sorkar, ki jingshakri bad ki lad ban phah ïa ki jingujor lyngba kane rynsan, kaba lah ban ïoh lyngba ka web, ka jingleit mih dalade ha ki Service Centre bad Village Data Volunteers.
Ka Meghalaya State GIS and UAV Centre, hapoh jong ka Meghalaya Basin Development Authority (MBDA) bad Planning, Investment Promotion and Sustainable Development Department, ka la ïoh ïa ka khusnam ha ka kyrdan “Excellence in Use of Geospatial Technologies for Transportation, Urban Development, and Other Projects.”
Kane ka sienjam ka la ïoh ïa ka khusnam halor ka rynsan prokram ka Meghalaya State Geo Portal (Meghalaya State GeoHub). Da kaba pyndonkam ïa ka AI, kane ka rynsan ka ai ïa ki jingtip kiba lah ban ïarap ïa ki jingtip kiba bniah ha ka ban buddien ïa ka jingpynjot ïa ki khlaw ki btap, ban batai lypa ïa ka jinglong jingman ka suiñbneng, ban kyrshan ïa ki sabut ban ïoh shim ïa ki rai kiba biang.
Ka National Health Mission (NHM), jong ka tnad ka koit ka khiah ka Jylla Meghalaya, ka la ïoh ïa ka khusnam ha ka kyrdan “Innovative Digital Health Services and Public Health Data Analytics.”
Ka NHM ka la ïoh ïa ka Award of Excellence halor ka jingmaitphang ïa ka sienjam kaba la tip kum ka MOTHER app.
Ka Jylla Meghalaya hapdeng u snem 2020 bad 2025 ka la ïoh ïa ka rekod ba ka la lah ban pynduna haduh 60% ka jingkhlad ki longkmie ba armet bad 34% ka jingduna ka jingkhlad ki khyllung ba mar syn kha.
Ïa kane ka jingai khusnam la pynlong da ka Governance Now kaba dei ka kynhun kaba pawnam ha ka ban pynmih ïa ki jingthoh bad kaba pynleit jingmut halor ki polisi treikam na ka bynta ki paidbah bad ka jingai jingshakri ka Sorkar.
