Shillong, K’Lyngkot 19
U Myntri Rangbah ka Jylla, u Conrad K. Sangma u la leit sngewlem bad pynpaw ka jingai khublei khatduh ïa u Reverend (Rev.) Dr. Robert R. Cunville ha ïing sah jong u ha Upper Lachumiere ha ka Lah Sngi U Blei.
Haba thoh ha ka rynsan lad pathai, u Conrad u la ong ba u Dr. Cunville u long “u briew uba aiti lut ha U Blei, u shakri ba ïaineh bad ba kohnguh” uba la im ïa ka jingim kaba don ïa ka jingngeit ba jylliew ha ka jinglong mynsiem.
“U Rev. Dr. Cunville u dei u briew uba aiti lut ha U Blei, u shakri ba ïaineh bad ba kohnguh, uba la aiti da ki phew snem jong ka jingim jong u ban pynsaphriang ïa ka ‘Gospel’ ha kylleng ka Thaiñ Shatei Lam Mihngi bad shabar kumjuh,” la ong u Conrad.
U Myntri Rangbah u la kdew ruh ïa ka jingïadei jong u Dr. Cunville bad ki Ministry u Billy Graham bad ka jingngeit ba skhem jong u, ka jingsngewrit, bad ka jingieid ïa ki briew, kaba la ai mynsiem ïa kiba bun bah ki ‘riew shimet.
“Ka nam jong ka jingshakri bad ka jingaiti lut jong u kan ïai im lyngba kiba bun ki jingim kiba u la ktah,” la ong u Conrad haba phah ka jingsngewlem sha ki bahaïing ha sem bad kiba ieid ba thoiñ jong u Dr. Cunville.
