Shillong, K’Lyngkot 19
Ka kynhun ki Nongïalam ka BJP ba la lamkhmat da u Myntri Sorkar Bah Sanbor Shullai, ha ka sngi Nyngkong, kala ïakynduh ïa u Myntri ka Ministry of Road Transport & Highway (MoRTH), Nitin Gadkari bad kyrpad ba un tuklar lem halor ka jingslem ban pyntrei ïa ka surok 4-lane na Umshyrpi sha Sadew.
Ka kynhun, kaba kynthup ruh ïa u President ka BJP Meghalaya u Rikman Momin bad kiwei-kiwei ki nongïalam, kila kren ruh halor ki jingeh na ki nala hapoh ka thaiñ Shillong Cantonment bad ka jingdonkam kyrkieh ïa ka flyover na Barik sha Jhalupara Taxi Stand, khnang ban pynduna ïa ka jingdheng kali hapoh ka thaiñ.
“U Myntri ka Sorkar Pdeng u la kular ïa ngi ba un sa ïakren ïa kane ka kam bad ka Ministry of Defence ba kan ai jaka sha ka NHIDCL na ka bynta ka project flyover,” ong u Bah Sanbor haba pynpaw ïa ka jingsngewnguh ïa u Gadkari.
U la ïathuh ruh ba na ka liang jong u Myntri ka Sorkar Pdeng u la ai jingmut ruh ban thaw ïa ka Infrastructure Development Committee ban lah pyndep kloi ïa ki projek”.
