Shillong, K’Lyngkot 19
Ka jingïap u nongbylla na Assam ha ka krem tih dewïong beaiñ ha East Jaiñtia Hills District ka Jylla Meghalaya sha shisien ka la pynphai khmat ïa ka jingma na ka kam tih dewïong ha rukom tih liew-khnai kaba la khang ha kane ka Jylla.
Utei uba la ïap la tip kyrteng kum u Mosaid Ali, 48 ka snem ka rta na Jamuna Moudanga na Hojai District ka Jylla Assam.
Ki kaiphod khubor ki kdew ba na ka liang ki pulit ki pyntip ba u Mosaid Ali u la ïap katba u dang trei ha ka krem dewïong beaiñ kaba la pynlong ïa ki bor ba dei peit ban khang ïa katei ka krem bad pynlong jingtohkit.
La ong ba katkum ki pulit na East Jaiñtia Hills District, katei ka jingjia ka la jia ha ka 14 tarik u Kyllalyngkot, 2026 ha ka krem dewïong beaiñ ha Umthe.
Shuh shuh la ong ba u Mosaid Ali u la kyllon katba u dang trei ha ka krem bad la rah ïa u sha Sutnga Community Health Centre.
Ki doktor ki pynbna ba u la khlad bad ka jingïap jong u Mosaid ka la poi sha ka jingtip u BP Katakey, u nongbishar ba la shongthait bad thung da ka Meghalaya High Court ban peit bad tohkit bniah halor ka kam tih bad khaïi dewïong ha ka Jylla ha kaba u la pan kaiphod na ki pulit halor katei ka jingjia.
Dang shen, ka tyllong khubor kaba la phah lang bad kawei ka lyngkhot video kaba pyni ïa ka jingmih tdem ba shyrkhei ka la ong ba katei ka jingmih tdem ka dei na ka jingbthei ka krem dewïong ha Thangsko.
Ym shym la kdew ba kan don kano-kano ka jingjia ba sngewsih ha kane ka jingbthei ka krem dewïong ïa ki nongbylla kiba bun na ki, ki dei na Nepal bad na kiwei pat ki Jylla.
Shuh shuh hashwa ka Khristmas ha u snem ba la dep ar ngut ki briew ki la ïap hadien ka jingmynsaw jur na ka jingpynbthei bom ba pynpra mawsiang ban ïoh khlong dewïong ha katei ka shnong kaba la jia ha ka 23 tarik u Nohprah, 2025.
Ki bor pulit kim jubab ban pynshai halor kane ka jingjia bad na ki tyllong khubor pat la ong ba uwei na kiba ïap ha katei ka sngi ba jia ka jingbthei dei uba na Bangladesh.
Katba uwei pat uba ïap u dei uba la tip kyrteng kum u Ashok Tamang bad une u la ïap hapdeng ka jingshah sumar ha Civil Hospital, Shillong myn ha ka 01 tarik u Kyllalyngkot, 2026.
