New Delhi, K’lyngkot:
Ka tnad ïada ri ka la jam shakhmat na ka bynta ban nangpynkhlaiñ shuh shuh ïa ki lad ai jingïada ba kham kyrpang na ka bynta ka ri da kaba pynbun ïa ki tiar siat bad ki tiar ïaleh kiba kham khlaiñbor bad kiba kham treikam sted.
Kum shi bynta ban pyntikna halor kane, ka la dep ban soi hashwa une u snem ïa ka jingïateh kaba la kot sha ka T. 659.47 klur na ka bynta ban thied ïa ki Night Sights (Image Intensifiers) na ka bynta ka suloi 7.62×51 mm SIG 716, ryngkat bad ki tiar ba ïadei bad kane na ka bynta ki shipai India, la ong ka jingthoh ba la wan na kane ka tnat.
Katkum ka jingpynbna, ki jingïohi ha ka por mynmiet da kaba pyndonkam da kine ki tiar, kan ïarap ha ka ban thew bad antad ha ka jingjngai kaba 500 meter, wat hapdeng ka miet kaba dum, bad kan nang pynbha halor ka jingpyntreikam ïa ka Passive Night Sights (PNS) kumba ka long mynta.
Ïa kane ka jingthied la kheiñ kum ka Buy (Indian-IDDM), kaba don palat 51 percent ki mar kiba paka, kaba pyni ïa ka sienjam kaba kongsan sha ka Aatmanirbharata (ka jingshaniah halade) ha ka jingshna ïa ki tiar ïada ri.
Ki heh sorkar ha ka jingpynbna ba la phah, ki la ong ba ka sienjam ban ai ka jingïada kaba pura ïa ka ri bad ka jingbuh jingshngaiñ na ki jingthmu thombor jong ki nongshun ka long ban don lypa ki lad jingïada bad kane ka long ban pynbiang shwa ïa ki tiar ïaleh bad ki tiar siat kiba khlaiñ bor bad kiba lah ban treikam kham bha khnang ban lah ban pyndonkam ïa ki ha kano kano ka por.
