Shillong, K’Lyngkot 19
Ka Khasi Students’ Union (KSU) ka la ai por shitaïew ïa ka Meghalaya Public Service Commission (MPSC) ba kan pyntreikam ïa ki jingai jingmut jong ka MPSC Reform Committee kaba kynthup ïa ka mat ban pynthikna ïa ka jingshakri kaba shai bad jingbym shah liang ha ka thungkam thungjam.
Haba kren sha ki lad pathai khubor, u Chairman ka KSU Employment Cell u Samla Reuben Najiar u la pynpaw ba watla ka Committee ka la aiti ïa ka kaiphod naduh u Nailar 2025, hynrei ym pat don satia kano-kano ka jingkylla ha ka rukom treikam hapoh jong ka MPSC bad kaba pynlong ïa ka Union ban leit ïakynduh ïa u Chairman ka MPSC u Bah D.Langstang ban buddien ïa kane ka kam.
“Ngi wan hangne ban dawa pyntreikam ïa ka kaiphod ba la pynmih ka Committee, ïa kita ki mat jingkylla ba ka la wanrah, ka MPSC ka dei ban pyntreikam mardor ïa ki, ngin ai por shitaïew ban pyntreikam ïa kita kiei-kiei baroh namar ngi la thait ban shu wan ïakren ïa kajuh shi kajuh,” la ong u samla Reuben.
Shuh-shuh u la ong ba na ka liang ka Union ka la leh ïa kaba ka lah ban leh bad da ka lynti kaba dei hynrei ki jingkylla kim urlong, watla ka Sorkar ka la wanrah ïa ka kaiphod ka MPSC kam pyntreikam bad lehse ka jingkylla kan wan tang lyngba ka ding bad ka snam.
“Ki samla jong ka jaitbynriew ki la thait ban ap bad ban sngap ïa kita ki kynrum kynram, kaba sngewsih lei ba ha ki bnai ba la dep, ba ka jingpynïaleh ïa ki eksam ka la nang kham sniew shuh-shuh, ba wat ïa ki eksam Grade-C bad D ruh ki wanrah da ki Descriptive Examination.” la ong u samla Reuben.
U la ong ba ka Union kan ym pdiang satia ïa kane bad ka la maham ruh ba kane kam dei shuh ban jia, da kaba u la kdew ba ka ‘Descriptive Examination’ ka dei na ka bynta ki kam kiba heh, hynrei ym dei na ka bynta ki kam kiba rit.
Haba ïadei bad ka ‘Advertisement’ ba ju pyllait ka MPSC na ka bynta kiwei pat ki nongshong shnong jong ka ri India, ka Union ka la dawa ba ka MPSC ka dei ban pyllait tang na ka bynta ki nongshong shnong ba pura jong ka Jylla Meghalaya.
U Samla Reuben u la ong ba na ka liang ka Union ka la kyntu ïa ka MPSC ba nangne shakhmat kine kiei-kiei kim dei shuh ban dang jia bad kyntu ban pyntreikam noh mardor ïa kiba ka MPSC Reforms Committee ka la wanrah.
