Shillong, K’Lyngkot 19
Ar ngut ki briew ki la shah kem noh ha ki pulit bad na ka kali jong ki, la ïoh ban kurup ïa u kynja ba khia haduh kumba 34.774 kilo.
Katkum ka khubor kaba la ïoh na ka website jong ki pulit la ong ba ha ka 14 tarik mynta u bnai, ha ka por kumba 9 baje mynmiet, la ong ba hadien ka jingïohi ïa ki pulit kiba dang pynlong ïa ka jingtalasi kali ha Damcherra-Kuliang, surokbah NH-06 ha East Jaiñtia Hills, kawei ka kali Maruti Celerio (ML05-T-8507) ba la ñiah da u Dimordas Basan Khyriem (28 snem) ryngkat bad uwei pat uba don lang hapoh ka kali u Wanlamshai Khasaiñ (20 snem) ki la pynphai noh ïa ka kali bad ban her biang na kajuh ka bynta kaba ki wan.
Haba ïohi ïa kane, na ka liang jong ki pulit ruh ki la beh kthong nadien ïa katei ka kali bad la lah ban ïoh bat noh ha ka thaiñ Sonapur (EJH), bad ruh ban ïoh kurup haduh 34.774 kilo u suba kynja napoh ka kali. Ki pulit ki la kem noh ïa kitei ki briew bad ka jingtohkit ka la ïaid shakhmat.
