Shillong, K’Lyngkot 19
Kawei ka longkmie kaba dei na kawei na ki shnong ha South West Khasi Hills la ong ba ka la shah thok pisa haduh palat 10 lak tyngka lyngba ka rynsan social media.
Katkum ka khubor ba la ïoh na ka website jong ki pulit, la ong ba kane ka longkmie ka la ai ka jingujor ba hapdeng ka 8 tarik Nohprah, 2025 haduh ka 12 tarik Kyllalyngkot, 2026, ka la ïoh pdiang ïa bun tylli ki jingpynbna na ka rynsan Facebook ha kaba ïadei bad ka ‘Stock Market Investment’.
La ong ba hadien ba ka la ‘click’ ha ka link kaba la ai ha ka jingpynbna (advertisement), uwei u briew u la pynkohnguh ïa ka ba kan bei ne thep pisa, ha kaba ka la thep haduh T.10,04,300 ha kaba la kular ba kan sa ïoh kham bun shah na kane. Hynrei kham hadien ka la sngewthuh ba ka la dep ban shah thok.
