Nongpoh, K’Lyngkot 19
Hadien ka jingmih khubor halor ka jingkynnoh pyntrei torti ïa katto katne ki bynta jong ka surok Nongpoh-Umden-Sonapur (NUS), ki ophisar jong ka tnad PWD Nongpoh Division khlem da shongthait ki la mih ban pynlong ïa ka jingtohkit bad wad bniah ban lap ïa ki jingshisha kumba la kynnoh ha kine ki khyndiat sngi ba la dep.
Haba ïoh ban ïakren bad u SDO ka PWD Nongpoh, u Bah D Shylla, u la ïathuh ba na ka liang ka ophis hi tang mar ïa ïohi ïa ki khubor halor ka jingkynnoh, na ka liang ki engineer kila leit ban jurip ïa shi lynter katei ka surok, khamtam ha ka shnong Plasha, kaba la kynnoh ba na ka liang u kontraktor u la pyntrei torti bad lah ban khlong da ki kti.
U la ïathuh ruh ba na ka liang ka ophis kala dep ban pynbiang ïa ki kaiphod jong ka jingtohkit bad ïa kane yn sa aiti pat sha u Chief Engineer ha Shillong na ka bynta ban leh ïa kaba donkam bad ruh ban shim ïa ki sienjam.
Utei u heh ophisar u la ïathuh ba ka jingpyntrei ïa ka surok ha shilynter ka long kaba biang ha kaba na ka liang ki engineer ka ophis kila khmih bha hi naduh ba sdang ban pyntrei bad pyntip ruh ka jingsiang rong ka dei tang ha ka kyrdan kaba nyngkong bad kan sa don biang sa shi kyrdan ka jingsiang rong kaba paka.
Shuh shuh, utei u ophisar u la ïathuh ruh ba ha ka jingjurip, la lap ruh ba ki don katto katne ki bynta kiba pum pum, ha kaba ki paidbah ki la theh da ka um ha ka rong kaba dang shu dep ban siang bad kane ka pyntlor ïa ka jingdam bit jong ka rong, kumta u la kyntu ïa ki paidbah ba kim dei satia ban theh um ha ka surok kaba dang shu dep siang rong, hynrei ba kin ïai shah shipor khnang ba ka surok kan long kaba skhem bad kaba neh slem.
