Shillong, K’Lyngkot 19
Ka Voice of the People Party (VPP) ka la pynpaw ïa ka jingartatien halor ka rai jong ka Sorkar Jylla ban khot ïa ki nongshim bynta ha ka ban ïakren halor ka jingtyrwa na ka bynta ban bsut ka kyndon kaba long kum ka ILP ha ka aiñ thymmai – Immi-gration and Foreigners Act, 2025 (I&FA).
“Kam don jingmut ban leit sha kum kata ka jingïalang. Ka nongrim jong ngi ka long ban pyntreikam ïa ka Inner Line Permit (ILP) kaba pura ha Meghalaya, ym da ka rukom treikam kaba long kum ka ILP,” la ong u nongaiktien ka VPP, Dr. Batskhem Myrboh ha ka Lah Sngi U Blei.
Hynrei u la pyntip ba ka seng kan sa pynlong ïa ka jingïakren (hapoh ka VPP) ban rai la kan leit ne em sha ka jingïalang ba la khot da u Myntri Rangbah ka Jylla, u Conrad K. Sangma.
“Ka Sorkar Jylla ka pyrshang ban pynkulmar jingmut ïa ki paidbah ka Jylla. Ngi la dep dawa ïa ka ILP na ka Sorkar Pdeng, kam don jingmut ban don ïa ka rukom treikam kaba long kum ka ILP,” bynrap u Dr. Myrboh. Kane ka jingpynsngew na ka liang ka VPP ka long hadien ba u Myntri Rangbah dang shen u la pynbna ïa ka rai jong ka Sorkar Jylla ban khot ïa ki nongshim bynta ban ïakren halor kane ka jingtyrwa, kaba thmu ban weng ïa ka jingeh jong ka jingwan rung kyrthep bad ka jingwan buhai shnong be-aiñ.
“Ngin sa khot ïa baroh ki seng saiñ pyrthei bad ki kynhun seng ban ïakren ïa kane ka jingtyrwa,” la ong u Conrad ha ka taïew ba la dep haba kren halor ki jingpyrshah ïa katei ka jingtyrwa, khlem da tip kaei kaba don ha ka.
“Kan long kaba bakla ïa ngi ban poi sha kano-kano ka jingpynkut khlem da ïohi shuwa ïa kaei kaba don bad ïa ka rukom treikam baroh kawei bad kumno ngin ïaid shakhmat bad kane,” la pynpaw u Myntri Rangbah.
U Conrad u la ban jur halor ka jingdonkam jong ka sienjam kaba tei, da kaba ong, “Ka mat jong ngi ka dei ka jingwan buhai shnong be-aiñ. Ka mat kam dei ka ILP, kam dei ka ‘Immigration Act’, kam dei ka MRSSA…ngi donkam ïa ki aiñ, ngi donkam ïa ki rukom treikam ki ban peitngor ïa kane.”
Shuh shuh u la kyntu ïa ki seng ka liang pyrshah ban ïashim bynta ha ka jingïakren, da kaba ong, “Ngim ong ba kaei kaba ngi la tyrwa kan long kaba dei, ngi lah ban bakla…hynrei nga tharai ba ngi lah ban poi sha kata ka jingkut jingmut tang lada ngi lah ban don ka jingïakren ne ïakren iwei-ïa-iwei pat.”
Katkum ka jingong jong u, ka Sorkar ka thmu ban pynïabiang lang ïa ka jingdonkam ban khanglad ïa ka jingwan buhai shnong be-aiñ bad ki jingsngewkhia jong ki paidbah bad ki kynhun seng ka imlang-sahlang.
“Ngi dang pyrshang ban ïaid shakhmat ban peit bad wad bniah la kata ka long kaba lah ne em,” la ong u Myntri Rangbah.
