Jammu, K’lyngkot:
Ki la don katto katne ngut ki briew kiba la shah kem na ka bynta ban kylli jingkylli namar ka jingkhynra kaba jur pyrshah ïa ki lehnoh ka la bteng bad ïaid sha ka sngi kaba lai ha ki bynta ba shaneng jong ka Kishtwar distrik ha Jammu & Kashmir ha ka sngi Ba-ar, la ïathuh ki heh sorkar.
Ïa kane ka jingkhynra la sdang ha ka shnong Sonnar hajan ka Mandral-Singhpora ha ka Chatroo belt ha ka Sngi U Blei, kaba la wanrah ïa ka jingïasiat kaba markylliang hapdeng ki lehnoh bad ki shipai, kane, ka la pynlong ïa uwei u shipai Paratrooper ban ïap bad hynñiew ngut kiwei pat ki la mynsaw, khamtam eh na ka jingmynsaw ba mih ka jingbthei kynsan jong u bom kawang kti ba la kawang da ki lehnoh.
Ki lehnoh ki la phet krad shapoh ka jaka khlaw, hynrei la pynpra ïa ka jaka rieh jong ki kaba la ker kut bha, kaba la dap da ki jingbam ba bun jait bad ki tiar pyndonkam kiba ïadei bad ka aïom Tlang, kynthup ki jaiñ syiad bad kiwei pat.
Ki heh ophisar, kynthup ïa u Inspector General of Police, Jammu Zone, u Bhim Sen Tuti bad u Inspector General of CRPF, Jammu, u R Gopala Krishna Rao ruh ki la poi sha katei ka jaka ba jia katei ka jingïasiat bad mynta ki dang shong ktem hangtei ryngkat bad katto katne ngut ki ophisar shipai ban peit bad khmih bniah halor kane ka jingleit khynra lehnoh.
