Shillong, K’Lyngkot 20
Ha ka jingpyrshang ban pynlong ïa ka New Shillong kum ka jaka sor kaba lah ban ïakhun pyrshah ïa ka jingkylla suiñbneng, ka Sorkar Jylla ka la sdang ïa ka projek thung dieng kaba thmu ban wanrah jingkylla ha katei ka jaka (ka ban dang wan) sha kawei na ki jaka sor kaba jyrngam tam ha ka thaiñ.
Hapoh kane ka projek kaba la pyntreikam ha u snem 2025, ka Jylla ka thmu ban thung 6,000 tylli ki dieng ha kylleng sawdong ka surok kaba palat 25 km bad 2 km ki ‘median’, da kaba pynlut T.2.5 klur ha kine ki san snem ban wan.
Ki heh Sorkar ki ong ba ïa kane ka sienjam la pynwandur ban pyntikna ba ka jingpynroi sted ïa ki jaka sor kan ym wan ha ryngkat ka jingduhnong ne jingktah ïa ka mariang.
Kane jingthung dieng kan ïaid lyngba ki lynti ïaid ba kongsan ha New Shillong Township, kynthup ïa ka surok Lad Ummir-Mawkhanu, ha kaba la thmu ban thung 10,000 tylli ki dieng, ha kaba 6,340 tylli la dep thung lypa ha kylleng ka surok (ba la tyrwa) kaba jrong 16.56 km.
Ym kum ki jingpynitynnad ba man ka por, ïa ka projek la buh kum kata ka ‘Green Infrastructure Intervention’. Katkum ka jingthoh ba la pynmih da ka Sorkar, la khmih lynti ba kine ki jingthung kin pynduna ïa ka jingjaboh ka lyer, ban pynduna ïa ka jingkhluit ha sor (urban heat island effect), ban tehlakam ïa ka jingtwa khyndew, kumjuh ban pynbha ïa ka jingshngaiñ ha ki surok bad ki jingitynnad.
“Kine ki lynti ba jyrngam kin pynlong ïa ka New Shillong kum ka jaka sor kaba pynïasnoh lang ïa ka jingkiew shaphrang jong ki kam ki jam bad ka jingïabiang lang ha ka mariang,” ong katei ka jingthoh.
Na ka liang ki heh ophisar ki batai ba kane ka projek ka long kum shi bynta jong ka jingpyrshang kaba ïar ban tei ïa ka New Shillong kum ka sor kaba “pynïasoh lang ïa ka jingkiew shaphrang ki kam ki jam bad ka jingïabiang lang ha ka mariang.”
Ka jingpynwandur ïa ka lynti ïaid ka kynthup ïa ka jingthung dieng ba bun syrtap-ki dieng na ka bynta ka jingkah sngi bad ki jingthung na ka bynta ka jingshai bad ka jingshngaiñ-kiba thmu ban pynlong ïa ka leit ka wan ba man ka sngi kaba kham shngaiñ bad sngewtynnad.
Shuh shuh la tei ïa ka jingïashim bynta jong ka imlang-sahlang ha ka saiñdur, da kaba kynthup lang ïa ki nongshong shnong ha ka jingthung dieng, jingai jinghikai, bad ka jingsumar kaba neh kaba la khmih lynti ban pynmih ïa ki kam ki jam bad ban pyntikna ïa ka jinglong ba ïaineh.
