Shillong, K’Lyngkot 20
U Bah Sanbor Shullai, MLA ka BJP na South Shillong bad ruh u Myntri ka Sorkar Jylla u la kyrpad ïa ka Sorkar Pdeng ban wanrah ïa ki skhim halor ka kolshor bapher-bapher ha Meghalaya khnang ban tyngkai bad ïada ïa ka kolshor ne jingleh tynrai ka Seng Khasi, Seng Raij bad ka Songsarek ki Garo.
U Myntri u la buh ïa kane ka jingkyrpad hakhmat u Myntri ka Sorkar Pdeng ba khmih ïa ka Tourism bad Culture u Gajendra Singh Shekhawat ha ka jingïakynduh hapoh ka ïingsah u Myntri ha New Delhi, ha ka jingïadonlang u President ka BJP-Meghalaya bad kiwei-kiwei ki nongïalam.
“Ngi la buh ka jingkyrpad hakhmat u Myntri ba un wanrah ïa ki skhim bapher-bapher halor ki kolshor ka Meghalaya khnang ba ngin lah ban ïada ïa ka kolshor ka Seng Khasi, Seng Raij bad ka Songsareh ki Garo,” ong u Bah Sanbor.
U Bah Sanbor u la tyrwa ruh ban buh ïa ka Cultural Heritage Traditional Market ha Mawlai CRPF Camp ban pyni ïa ka jingriewspah jong ka thaiñ Shatei Lam-Mihngi, haba kyrpad ïa u Myntri ba un wan jurip ïa kane ka jaka ban peit thuh ïa ki jingdonkam, kaba lah ban pynkhlaiñ ïa ka kam jngohkai na ka kolshor.
Nalor kane, u Bah Sanbor u la kyrpad ïa u Myntri kam jngohkai ba un pynlait ïa ka Tourism Development scheme ha South Shillong Constituency, nalor ka ropeway project, ban lah aikam aijam ïa ki nongshong shnong ka thaiñ.
“Ngi la kyrpad ruh ïa u Myntri kam jngohkai ba un pynlait ïa ka Tourism Development scheme ha South Shillong Constituency, nalor ka ropeway project, ban lah aikam aijam ïa ki nongshong shnong ka thaiñ,” ong u Bah Sanbor.
Ka jingïalang kala pynleit jingmut ruh halor ka jingkyntiew ïa ka kolshor ba hiar pateng jong ka Jylla bad ban pynbun ïa ki jingtei jong ki kam jngohkai hapoh ka Jylla.
