Shillong, K’Lyngkot 20
Ka lympung ai jingmut kaba long ha ka kyrdan pyrthei halor ka phang “Bioeconomy and Health Technology Assessment (HTA): Evidence for Better Health Decisions” la pynlong ha IIT Guwahati. Ïa kane ka lympung la pynbit pynbiang lang da ka Indian Institute of Public Health Shillong (IIPHS), IIT Guwahati, bad AIIMS Guwahati, ryngkat ka jingïatreilang bad ka Health Technology Assessment in India, Department of Health Research, Ministry of Health and Family Welfare, Sorkar India.
Ka jingïalang ka la wallam ïa ki nongthaw aiñ, ki nongwad bniah (researchers), ki doktor, ki khynnah pule, bad ki riew shemphang ha ka koit ka khiah ban ïatai halor ka jingdonkam ban pyndonkam ïa ki sakhi kiba thikna ban pynskhem ïa ka rukom treikam ka koit ka khiah ha India.
Ka thong jong kane ka lympung ka long ban pynsngewthuh halor ka Health Technology Assessment (HTA), khamtam sha ki khynnah pule bad ki nongwad bniah kiba dang sdang, khnang ban don ka jingïatreilang na ki phang bapher-bapher ha ka rukom ai jingshakri kaba bha tam. Ka HTA ka dei ka rukom wad bniah kaba pynshongnia halor ka jingbit jong ki dawai, ki kor ki bor bishar jingpang, bad kiwei de ki jingshakri koit khiah ha kaba ïadei bad ka dor ka mur bad ka jingbha kaba ka wallam. Ka long ka lynti kaba donkam ban pynïaid ïa ki polisi Sorkar bad ban pyndonkam ïa ki lad ki lynti (resources) kiba bit kiba biang.
Ka lympung ka la sdang da ka jingïalang ba la pynïaid da u Prof. Utpal Bora (IIT Guwahati) bad Prof. Sandra Albert (Director, IIPH Shillong). Ïa ka lympung la plie da u Prof. Devendra Jalihal, Director jong ka IIT Guwahati, bad hadien kata, ka Dr. Kavitha Rajsekar (ICMR-DHR) ka la ai ka jingpynshai halor ki kam HTA ha India katba ki riew shemphang kiba la ai jingkren ha kane ka sngi ki long u Dr. Gaurav Jyani (PGIMER Chandigarh) ba la kren halor ka jingkheiñ dor ïa ka jingbha ka koit ka khiah, Dr. Beena Joshi (ICMR-NIRRH, Mumbai) ba la kren halor ka jingpyndonkam ïa ki sakhi HTA ha ka rukom thaw polisi bad ki jingeh ban pynlong ïa ka jingwad bniah kum ka rai kaba shisha bad Dr. Somen Saha (IIPH Gandhinagar) ba la kren halor ki rukom kheiñ ïa ka jinglut jingsep (costing) ha ki jingwad bniah HTA.
Kawei ka bynta kaba khraw ka dei ka jingpynshai ïa ki kot jingthoh jingwad bniah (research papers) ba la pynïaid da Dr. Phulen Sarma (AIIMS Guwahati), ha kaba ki la don hynñiew tylli ki jingpynshai halor ka jingpyndonkam ïa ka AI ha ka bishar jingpang TB, ka jinglut ha ka bishar jingpang bampong, bad kiwei de.
Ha ka por janmiet, u Dr. Bhaskar Borgohain (NEIGRIHMS, Shillong) u la ïathuh halor ka jingwad bniah ïa ki kjat/kti briew (prosthesis) kiba sting, kaba pyni ïa ka jingshemphang ka HTA ha ki tiar sumar kiba thymmai. U Dr. Biju Soman (Trivandrum) u la kren halor ki software kiba laitluid ban pyndonkam, bad ka Saudamini V. Dabak (Thailand) ka la ai ka jingmut na ka ri Thailand halor kumno ban jied ïa ki phang kiba donkam tam ban wad bniah.
Kane ka lympung ka la kut da ka jingïatai kaba bit kaba biang halor ki jingeh bad ki lad kiba don ban pynkhlaiñ ïa ka HTA ha India. Kane ka jingïalang ka la lah ban pynshai kdar ba ka jingpyndonkam ïa ki sakhi kiba thikna ka long ka lynti kaba khraw ban pynbha ïa ka rukom ai jingshakri koit khiah ha ka ri.
