Shillong, K’Lyngkot 20
U Bah PT Sawkmie, MLA barim u la ong ba tang shisngi la lah ban ai Inner Line Permit (ILP) bad ban weng ïa u Vice Chancellor (VC) ka North Eastern Hill University (NEHU), lada mon u Myntri Rangbahduh ka ri u Narendra Modi bad u Myntri ka tnat Kam Pohïing u Amit Shah.
U Bah Process u pynpaw ba u la mih u snem thymmai bad ki khmih lynti ba ki mat kiba ïadei bad ka jaidbynriew ha une u snem 2026 kin urlong noh kum ka ILP kaba la slem bha kaba kum ka jaidbynriew ka la angnud. Ki khmih lynti ba ka Sorkar India kan mynjur bad ai noh ïa ka ILP.
Namar ha kine ki sngi kiba mynta la ïohi ïa ka jingsyier jong ki nongshong shnong ka Jylla baroh kawei, khamtam ha ka jingwan rung kyrthep ki briew kiba har rukom, u la ong bad bynrap ba la ïohi ba ka mat ILP mynta ka la khluit biang, kumta u kyntu ïa ka Sorkar MDA ba kan shimkhia ïa kane.
U la ong ruh, wat ka Sorkar Meghalaya Democratic Alliance (MDA) kaba ïatrei ryngkat bad ka Sorkar National Democratic Alliance (NDA) ba la ïalam da ka BJP ha Delhi, hynrei u la ïohi ba ka Sorkar BJP kam burom ïa ka Sorkar MDA tang khyndiat ruh.
Halor u Vice Chancellor ka NEHU, u pynpaw ïa ka jingsngewkhia ba ki samla pule ki mad jingeh, da ka jingbym weng ka Sorkar BJP ïa u Vice Chancellor uba ki samla ki la dawa ba dei ban weng noh ïa u.
