Shillong, K’Lyngkot 20
Ka BSF (Jalandhar) ka la jam sha ka final ha ka 11th All India Chief Minister’s Gold Cup Football Tournament, hadien ba ka la lah ban pynliem noh ïa ka Sudeva Delhi FC lyngba ka tie-breaker da 6-5 kol.
Ha katei ka jingïakhun semi final kaba ar kaba la long ha ka lah sngi U Blei ha Jorethang Football Stadium kaba ha Sikkim, kitei ki kynhun ki la ïathep mar shi kol haduh kaba kut ki 90 minit bad dei ha ka jingïashut tie-breaker ba ka BSF ka la khur ïa ka jingjop. U rangïalehkai kane ka kynhun shipai khappud, u Sonu Lal u la ïohpdiang ïa ka nam Man of the Match halor ka jinglah ban ïalehkai bha ka jong u ha katei ka jingïakhun.
Te kumta ka BSF (Jalandhar) kan ïaknieh ïa ka nam lahduh pyrshah ïa ka Nongkseh SC ha ka jingïakhun final ka ban long ha ka sngi Palei.
Lah ban kdew ba ïa kane ka lympung la pynlong da ka Jorethang Football Association ha ryngkat ka jingkyrshan lang ka tnat ïalehkai jong ka Sorkar Sikkim, ka Sikkim Football Association bad ka Organising Committee jong ka Maghey Sankranti Mela 2026.
