Shillong, K’Lyngkot 20
U Myntri Kam Pohïing barim ka Sorkar Jylla uba dei ruh u nongaiktien ka seng NPP, u James P.K. Sangma u la ong ba u long ba la kloi ban shim ïa ka jingkitkhlieh ban mihkhmat ïa ka Meghalaya ha Rajya Sabha, lada jia ba ka party bad ki paidbah ka Jylla ki shim ba u long uba biang na ka bynta katei ka kam.
Ha kajuh ka por, u James PK Sangma u la pynshai ba ki jingïakren ha ka party ki dang long kiba shu ïa mutdur, namar ba ka jinglong MP u Dr.W.R. Kharlukhi ha Rajya Sabha kam pat kut bad ka samoi treikam jong u kan kut ha ka 21 tarik u bnai Jylliew.
“U Dr.W.R.Kharlukhi uba mihkhmat ïa ka NPP, u la dep pynpaw ba um don jingthmu shuh ban mihkhmat biang ha ka samoi kaba ar, da kaba pynpaw ïa ka jingkwah ban shongthait noh na ka kam saiñ pyrthei bad ban ailad ïa ki nongïalam kiba kham samla ban mih shakhmat,” la ong u James.
U James Sangma u la ong ba ka jingkren jong u ka la pynmih ïa ka jingïakren hapoh ki seng saiñ pyrthei ba la u James P.K.Sangma lane ka MP barim ka Lok Sabha na Tura na ka NPP, ka Agatha K. Sangma ki lah ban shah jied na ka bynta katei ka shuki.
Haba batai ïa kane ka kam kum kaba dang sahteng, u James Sangma u la ong ba ka rai ka shong beit ha ki nongïalam ka party. “Ha kane ka kynti, ka dei tang ka jingantad, lada ka seng ka shaniah ha nga ïa kano-kano ka jingkitkhlieh, nga kloi ban pdiang ïa kano-kano ka kam kaba ka seng ka sngewdei”, u la ong.
