Baghmara, K’Lyngkot 20
U Myntri Rangbah ka Jylla, u Conrad K. Sangma ha ka Sngi Ba-ar u la plie ïa ka skul Counter-Insurgency-Anti-Terrorism (CIAT) bad ka Integrated Police Welfare Complex (IPWC) ha Baghmara, South Garo Hills.
Haba ai jingkren ha kane ka sngi, u Conrad u la ai khublei ïa ka tnad Home & Police halor ka jinglah ban pyndep ïa ka Integrated Police Welfare Complex bad CIAT School.
Da kaba kubur ïa ka jingïohi jngai kaba don ha lyndet jong kane ka projek, u la ai ka jingïaroh ïa u Superintendent of Police barim, uba long mynta u Inspector General of Police, u Davis N. R. Marak.
“Nga shim ïa kane ka lad ban ai khublei ïa u na ka bynta kane ka jingïohi jngai, ka jingkut jingmut, bad ka jingaiti lut jong u ban ïaid shakhmat bad kum kane ka projek kaba kongsan, wat hapdeng ki jingeh ba la ïakynduh ha ka jingïaid lynti,” u la ong.
Ha kajuh ka por, u la pynpaw ruh ka jingsngewnguh ïa u Myntri kam pohïing barim, uba long mynta u Myntri ka tnat pule-puthi, Bah Lahkmen Rymbui bad ka kynhun jong u kiba la ai jingmynjur shuh-shuh ïa ka pisa ban pyndep ïa kane ka projek.
U Myntri Rangbah ka Jylla u la kdew ba ka jingbiang ka jaka jong kane ka Complex ka pynbiang ïa ka jinglong-jingman kaba paka ban ai jinghikai ym tang ïa ki Pulit ka Meghalaya hynrei wat ïa ki pulit na kylleng ka ri India bad nabar ri.
“Ka skul Counter-Insurgency-Anti-Terrorism ka ïoh jingmyntoi na ka jinglong jong ki jaka khlaw kiba rben, ka jinglong-jingman suiñbneng kaba tynjuh, bad ka jinglong-jingman kaba eh jong ka jaka, kaba pynlong ïa ka kum ka jaka kaba biang bha na ka bynta ki prokram ai jinghikai kiba kham shalor,” u la ong.
U la ban jur ruh halor ka jingdonkam ban bteng ha ka ban thaw ïa ki buit thymmai kumjuh ban pynroi ha ka liang ki jinghikai, khamtam ha ka jinglong-jingman ba kylla jong ka jingpynjari aiñ bad ki jingeh kiba nang kiew ha ka jingïakhun pyrshah ïa ki lehnoh.
“Nga pynshlur ïa ki heh ophisar ban pyntikna ba ïa kane ka jaka yn pyndonkam hok bad ban pynbha na ka por sha ka por ban pynbiang ïa ki jingdawa ba kylla jong ka kam pulit ka juk mynta, teknoloji, bad ki buit ïakhun pyrshah ïa ki lehnoh, khamtam haba kheiñ ïa ka jingjan u pud u sam jong ka Jylla. Ka jingpynwandur thymmai bad ka jingpynroi kaba bteng ha ka jinghikai kan long kaba kongsan bha,” u la bynrap.
Halor ka bynta ba kham ïar jong ki bor pynjari aiñ, u la ong, “Ka jingpynneh-pynsah ïa ka suk ka saiñ ka dei kawei na ki mat ba kongsan tam na ka bynta kano-kano ka Sorkar. Man la i sienjam iba rit ba la shim ban pynkhlaiñ ïa ka kynhun pulit, ka synñiang sha ka thong kaba kham heh ban pyntikna ïa ka jingshngaiñ bad jingshong suk shongsaiñ ha ka Jylla, bad nga kyrmen ba ka kynhun kan ïai bteng ban trei ryngkat bad kane ka jingkular ha ki por ban wan.”
Kane ka Complex ka don hynriew tylli ki bynta-Police Hospital/Dispensary, Officers’ Mess, JCO Mess, Police Welfare Training Centre, Sports Complex, bad Recreational Centre.
Ka kynthup ruh ïa ka surok bad ka jaka pynlang um kaba don halor.
Ka jingpyntrei ïa kane ka Complex ka la long hapdeng u bnai Rymphang 2022 bad Kyllalyngkot 2026, bad kane ka jaka ka pyni ïa ka jingangnud jong ka Sorkar ban kyntiew ïa ka jinglong skhem, ka jingtreikam, ki kyrdan ai jinghikai, bad ka bha ka miat jong ki pulit.
Na ka liang u Symbud Myntri Rangbah ka Jylla, Bah Prestone Tynsong u la pynpaw ïa ka jingkmen halor kane ka jingplie paidbah da kaba kdew ba “ka Baghmara mynta kan ïoh ïa kajuh ka jingïarap bad ka jingpynroi kumba long lem kiwei pat ki distrik.”
U la pynpaw ïa ka jingdonkam jong ka Complex na ka bynta ki pulit bad ki nongshong shnong ka thaiñ, da kaba pynpaw ba kan “ai mynsiem bad kyrshan ïa ki ophisar jong ngi hapdeng ka jingshakri ïa ki paidbah ka Jylla, khamtam ha kane ka distrik.”
Nalor kane, u la pyntikna ba ïa ki jingdonkam kiba dang sah, kynthup ïa ka Dispensary bad ka Sports Complex yn sa pyndep ha ki snem ban wan.
Ha kane ka prokram la wan ban ïashim bynta lang ruh da u Myntri ka tnat pule-puthi, Bah Lahkmen Rymbui, Director General of Police, Kong I. Nongrang, Chief Secretary, Dr. Shakil P. Ahammed, lem bad kiwei-kiwei.
