Jammu, K’lyngkot:
U Myntri Rangbahduh ka ri, u Narendra Modi, ha ka sngi Ba-ar, u la ai khublei ïa u Nitin Nabin, halor ka jingshah jied jong u kum u National President ka BJP bad u la ong ba mynta u Nabin, un shakri kum u “boss”, bad un long u “nongbud” jong ka seng, la ïathuh ka lad phah khubor.
U Nitin Nabin u la shah jied kum u National President ka BJP ha ka jingïalang seng (Sangathan Parv) ha ka ophis treikam jong ka seng ha New Delhi, ha kaba u la long u nongïalam ba khynnah tam ban bat ïa kane ka kam.
U President ka BJP ba la mih noh na ka kam u J.P. Nadda, u Rajnath Singh, Myntri ka tnat ïada ri jong ka sorkar pdeng, u Amit Shah u Myntri ka tnat ki kam pohïing jong ka sorkar pdeng bad u Nitin Gadkari Myntri ka sorkar pdeng ki la ai khublei ïa u President bathymmai jong ka BJP u Nabin ha ka ophis treikam jong ka seng ha Delhi.
Haba kren ha ki paidbah, u Modi u la ong, “Ha ki katto katne bnai ba la dep, ka rukom jied nongmihkhmat ka la ïaid shakhmat na ka bynta ban jied ïa ki nongïalam naduh ki kynhun kiba rit tam jong ka seng haduh u National President ha ka rukom synshar paidbah, da kaba buh ha ka jingmut ïa ka mynsiem bad man la ka kyndon jong ka Riti synshar jong ka BJP,” la ïathuh ka tyllong khubor.
