Jowai, K’Lyngkot 20
Ki pulit ka West Jaiñtia Hills ki la ïoh ban kem noh ïa haduh 18 ngut ki nong Bangladesh ha ryngkat arngut ki nongïalam lynti kiba dei ki nong India lem bad san ngut ki nongñiah kali hadien ka jingkhynra ha ka step jong ka 20 tarik Kyllalyngkot.
Katkum ka khubor pulit la ong ba ka kynhun ba kyrpang na ka tnad pulit ha ryngkat ka jingsynran lang u Rangbah Shnong bad ki dkhot ka Village Defence Party (VDP) jong ka shnong Demthring ki la ïoh ban bat ïa kawei ka kali ha ka por 3 baje mynstep hadien ka jingbeh thong na Lad Demthring.
Ïa kane ka kali kaba don ïa u nombor ML04-D-7339, la lah ban pynsangeh noh hajan Sanmala Guest House ha Amlarem ha kaba la lap ïa saw ngut ki nong Bangladesh kiba don hapoh, katba ïa u nongñiah la ithuh kum u Vishal Dkhar uba dei na Dawki.
Ha kane ka jingkhynra la ïoh ruh ban kem noh ïa arngut ki nongïalam lynti kiba la tip kyrteng kum u Meban Dkhar bad u Melari Rasmut napoh Lad Demthring bad ïoh ban kurup noh ïa kawei pat ka kali kaba don ïa u nombor ML04-D-4739.
Haba pynlong ïa ka jingtohkit, u Meban u la phla ba ki don sa lai tylli kiwei pat ki kali kiba kit ïa ki nong Bangladesh kiba wan na ka thaiñ Jowai ban leit sha Dawki. Kumta ki pulit mardor ki la pynlong ka jingpynap shrip ha ki bynta jong ka ïew Amlarem hadien ba ki la ïoh ban bat noh ïa kine ki kali ha ka por kumba 3.35 mynstep.
Kine ki kali ki kynthup ïa kaba don ïa u nombor ML05-AD-6424 ba la ñiah da u Blessing Pamthied uba dei na ka shnong Jarain, kaba don ïa u nombor ML04-D-4993 ba la ñiah da u Twel Rongngi na ka shnong Shkentalang bad ka ML04-E-0640 ba la ñiah da u Rimi Lyngdoh na ka shnong Shkentalang. Ha kine ki kali la lap ba ki don haduh 14 ngut ki nong Bangladesh.
Baroh ki la don haduh 18 ngut ki nong Bangladesh, arngut ki nongïalam lynti kiba dei ki nong India bad san ngut ki nongñiah kali kiba la shah kem noh, bad ïa baroh ki san tylli ki kali la kurup noh ha kane ka jingkhynra.
Ki pulit ki la rejistar case halor kane ka jingjia bad la kem noh ïa baroh kine ki briew ban pynlong shuh-shuh ïa ka jingtohkit hapoh ka kyndon jong ka Immigration and Foreigners Act, 2025.
