Nongpoh, K’Lyngkot 20
Ka kynrum kynram bad huri hura ha ka shnong Maikhuli, kawei na ki shnong khappud ka Ri-Bhoi bad Assam ka la sdang ban khie im biang ha kaba ha kane ka kynti u Rangbah Shnong lem bad kiwei de ki nongshong shnong, la kynnoh ba ki la shah ktah kti ha ki briew na ka Jylla Assam.
Katkum ka khubor ba la ïoh lum, la ïathuh ba kane ka huri mynta ka sien, ka dei hadien ba ki briew shnong ha ryngkat ki briew na ka tnad MeECL ki la leit ban pynïeng ïa ki post ilektrik ha katei ka shnong, kaba la sdang nyngkong najan ka pung dohkha.
La ïathuh ba katba ka jingpynïeng ïa kitei ki post ilektrik kiba don kumba hynñiew tylli eiei ka dang ïaid shaid-shaid, ki la don ki briew na ka Jylla Assam kiba la wan mih ban pyrshah bad khanglad kat haduh ba kala mih ka huri hura bad ka jingïaktah kti mar met.
Katkum ki durkhih ba la paw, la ïohi ruh ba watla ki pulit ka Assam ki la don ha katei ka jaka bad ïohi ïa ka jingshah shoh jong u Rangbah Shnong hynrei kim shym la leh eiei hynrei ban long tang ki nongpeitkai.
Kum ban shu kdew hangne, dang ha u bnai Nohprah kala don ka jingkynad hapdeng ki nongshong shnong ka Maikhuli bad kiba na Assam bad na ka jingshimkhia ki bor pynïaid district, la lah ban tem noh ïa katei ka jingkynad bad la thaw ruh da ka kynhun ïasuk lane kata ka ‘peace committee’ ha ka 2 tarik u Nohprah, 2025 ban wanrah biang ïa ka shongsuk shongsaiñ.
