Shillong, K’Lyngkot 20
Hapdeng ka jingsngewsih kthang jong ki bahaïing hasem bad jong ka Jylla hi baroh kawei, la leit ontep noh ïa ka met ba dangsah jong u Rev.Dr. Rieweh Robert Cunville ha ka 20 Tarik u Kyllalyngkot 2026, ha u lum jingtep ka Balang Presbyterian Laitumkhrah, Lawjynriew.
Ïa ka met ba sah u Rev.Dr.R R Cunville la pyndep ïa ka jinglehniam shuwa ha ïingsah ha Upper Lachumiere bad la rah pat ban pyndep ka jinglehniam kaba khatduh ha Ïingmane Balang Presbyterian Laitumkhrah, Shillong, kaba la pynïaid da u Moderator ka KJP Synod Pdeng u Rev.T.Khongjee.
Ha kane ka sngi leit ontep ïa ka met ba sah jong u Rev.Dr.R R Cunville la ïadonlang ki nongïalam na ki balang bapher-bapher, ki nongïalam seng saiñ hima sima, ka Dr.Elaine Duncan kaba mihkhmat na ka United Bible Society, u Roy Graham uba mihkhmat na ka Billy Graham Evengelistic Association bad kiwei-kiwei de ki paidbah kiba la tuid ha kane ka sngi.
Lah ban kdew hangne ba U Rev.Dr. R R Cunville u dei u wei na ki nongïalap bakhraw uba ka nam jong u ka la paw ha ka ban ïalap ïa ka Gospel ka jong U Blei, u la khlad noh na kane ka sla pyrthei ha ka step jong ka 17 tarik u Kyllalyngkot, 2026 hadien ba ka jingshitom ka la neh katto katne sngi ha ka met jong u.
Ka nam u Rev.Dr. R R Cunville kam dei tang ha kane ka Jylla hynrei ha ka Thaiñ Shatei Lam-Mihngi, ha ri India bad ka pyrthei hi baroh kawei.
U Pastor Cunville ula khlad noh ha ka rta kaba 86 snem bad u dei u khun jong u (L) Dr. R.L. Cunville bad (L) Kong Felicia Kharshïing bad la kha ïa u Rev.Dr. Cunville ha ka 15 tarik u Lber 1939 ha Tezpur, Assam.
U Pastor Cunville udei uba la pawnam bha ym tang hapoh jong ka ri India hynrei ha ka pyrthei hi baroh kawei bad udei uba la trei borbah ha ka ban leit ban ïalap bad pynsaphriang ïa ka ktien u Blei ha kylleng ki ri.
Ha ka jinglehniam khatduh ïa u Rev.Dr.R R Cunville la ïathuh ruh shaphang ka jingïaid lynti jong u ha ki por kiba mynshuwa eh.
La ïathuh ba u Rev.Dr. R R Cunville u la thmu ban leit pule ïa ka aiñ (Law) ha ka por ba u dang samla hynrei hadien pat u la kylla long u nongïalap ba paw ha ka pyrthei hi baroh kawei.
Ha kane ka sngi la ïoh ka jingkren na ka Dr. Elaine Duncan kaba mihkhmat ïa ka United Bible Society, u Roy Graham na ka Billy Graham Evangelistic Association, na ka Presbyterian Church of India, ka KJP Synod Pdeng bad u Secretary ka Balang Presbyterian Laitumkhrah u Tbn C Diengdoh uba la ai jingkren halor ka histori shaphang u Rev.Dr.R R Cunville ha ka jingshakri ïa u Blei bad ïa ka Balang bad khamtam ha ka jingleit ban ïalap ïa ka ktien u Blei ha kylleng satlak jong ka pyrthei.
