Shillong, K’Lyngkot 20
Ka Laitkor SC bad ka Lumparing SC ki la jam sha ka final ha ka lympung ïalehkai Women’s Football League 2026 ba la pynïaid da ka Shillong Sports Association (SSA) ha ka sngi Ba-ar.
Ha ka jingïakhun semi final kaba nyngkong kaba la long ha SSA Stadium kaba ha Polo, ka Laitkor ka la pynliem noh ïa ka Pay For Right Football Academy (PFR FA) da 2-0 kol.
Kane ka nam jop ka la wan urlong lyngba ki kol ba la thep da ka Ïaraplang Nongrum ha ka minit kaba 34 & 68.
Watla kine ki kynhun ka la long kiba ïabiang bor bha ha ka rukom ïalehkai bad ki la long ki kynhun kiba khlem shah rem naduh ka jingïalehkai jong ka Group-A bad Group-B bad wat haduh ka quarter final, hynrei ka Laitkor ka la lah ban pyni ïa ka jingkhlaiñ bad ruh ban khur syndon ïa ka jingjop.
Haba phai sha kawei pat ka jingïakhun semi final kaba ar, ka Lumparing ka la jop da 4-2 kol ïa ka Rangdajied United FC.
Ha kane ka jingïakhun baroh ar tylli ki kynhun ki la long kiba ïabiang bor bha namar ki dei ki kynhun kiba la ïoh ban lamkhmat ha ka Group-B bad Group-C. Ka Lumparing ka la thep ar kol tang hadien shiteng kynta lyngba ka Marbarin Nongrum ha ka minit kaba 3 bad ka Pynhun Shulet (37).
Ka Pynhun ka la thep biang ïa ka kol kaba ar jong ka ha ka minit kaba 48 jong ka kylla miet bad kawei pat da ka Bahunlang Synrem (50). Hynrei ka Rangdajied ka la lah ban pynphai kylla ar kol lyngba ka Eiladki Ksoo (49) bad ka Ibadaaihun Nongsiej (83) hashwa ba kan mad ïa ka jingshah rem.
Te kumta ka Laitkor bad ka Lumparing kin ïaknieh ïa ka nam lahduh ha ka final ka ban long ha ka sngi Saitjaiñ ha ka por 1 baje mynsngi.
