Thiruvananthapuram:
Kumba ka paw na ka jingwad bniah ha ki snem ba la leit, la ong ba ka jingduna pisa ka sorkar ka paw ba ka long ka jingeh kaba khraw ha kaba pyntreikam ïa ka rukom bathymmai ha ka jingai bam jingbam sngi ha ki skul bad kane kan sa nang buh jingeh lada kan dang bteng ha une u snem ba mynta.
Kiba bun ki kynhun seng jong ki nonghikai ki la pynpaw ïa kane ka mat, kaba la pynlong ïa ka tnad ban ai jingmut ban ïakren bad ki sorkar shnong (LSG) na ka bynta ki lad jingïarap ba kham bun.
Ïa mynta, ka sorkar ka thaiñ ki don bynta ha kaba pynbiang ïa ka jingbam mynstep ha ki katto katne ki skul.
“Ngi dang wad ban plie ïa ki jingïakren shaphang ka jingïashim bynta jong ki ha ka prokram bam mynstep ruh kumjuh,” ong ka ophis treikam jong u Myntri.
Ïa ka rai kaba khatduh yn sa shim tang hadien ar bnai, hadien ka jingïakren bad ki nongmihkhmat jong ki LSG bapher bapher bad u Myntri jong ka LSG.
Ïa ka skhim bam jingbam sngi la kyrshan da ka sorkar pdeng bad ki sorkar jylla ha ka jingthew kaba 60:40.
U Myntri ka General Education un pynlong ruh ïa ka jingïalang bad ka Myntri ka tnat pla tyngka ban wad ïa ki lad ki lynti ban ai pisa shuh shuh na ka bynta katei ka skhim.
Nalor kata, la phah shithi sha ki seng saiñpyrthei bapher bapher ban pan jingkyrshan na ki ha ka kyrdan jong ka thaiñ, la ong ka ophis treikam jong u Sivankutty.
“Tang katto katne tylli ki skul kiba kham duna ka jingkhlaiñ jong ki khynnah skul ki ïakynduh ïa kane ka jingeh”, la ong u General Secretary jong ka Kerala School Teachers Association (KSTA) u T K A Shafi ha kawei na ki lad phah khubor. Tang ki jingkylla kiba biang por la pynrung ha ka Menu, kata ruh ryngkat bad ki lad ki lynti kiba bun, la ong u Shafi.
“Ka jingai jingmut jong ngi ka long ban pynkylla ïa ka Plan Fund jong ki bor pynïaid ka thaiñ ban lah ban kyrshan shuh halor ki jinglut jingsep,” la ong u General Secretary jong ka Kerala Pradesh School Teachers’ Association (KPSTA) ha Vattappara u Anilkumar.
Ka seng ka la kyntu ïa ka sorkar ban ai jingkyrshan pisa shuh shuh haduh ban da lah ban pynurlong ïa kane ka jingthmu.
“Ngi kwah ba ki khynnah kin ïoh ïa ki jingbam kiba bha tam, hynrei ka pisa ba la pynbiang mynta kam pat dap ban ai jingbam katkum ka Menu bathymmai,” ong u Treasurer jong ka Kerala State Teachers’ Union (KSTU), u Sidhiq Parakkod.
Ïa ka Menu kaba mynta la ong ba la pynkhreh da ka komiti ba tbit ban pynbiang ïa ka jingbam kaba biang bad kaba tei met. Hynrei ym shym la don kano kano ka jingïakren bad ki bor pynïaid skul, u la ong.”Ngi la ai jingbam sngi ïa ki khynnah skul ha u bnai ba la dep ruh, khlem ka pisa kaba biang,” u la bynrap.
Ki nongmihkhmat na palat 42 tylli ki seng jong ki nonghikai ki la ïashim bynta ha ka jingïalang kaba la long ha Thiruvananthapuram.
Ka Menu ba dang dep pyllait thymmai ka kynthup ïa ka Vegetable Fried Rice, Lemon Rice bad Vegetable Biryani, ha kaba kane ka la paw ha ka Social Media.
